Bab Mahkemesi 54 Numaralı Sicil (H. 1102 / M. 1691) cilt: 20, sayfa: 191 Hüküm no: 209 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia’nın mehir ve nafaka hususunda boşandığı kocası Ahmed Çelebi b. Mehmed’in zimmetini ibra etmesi Mahmiye-i İstanbul’da Koca Mustafa Paşa Câmi‘i kurbunda vâki‘ Âlem Bey mahallesi sâkinelerinden Râbia bt. Ebûbekir nâm hâtun mahalle-i mezbûreden Abdullah Efendi b. Mehmed Efendi ve el-Hâc Mustafa b. Hüseyin nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf ve mahfil-i dîn-i münîf-i ezherde, zevcim işbu râfi‘ü’l-kitâb Ahmed Çelebi b. Mehmed nâm kimesne mahzarında ikrâr ve takrîr-i kelâm edip, mezbûr Ahmed Çelebi bundan akdem zevcim olup beni tatlîk etmekle zimmetinde mütekarrir ve ma‘kūdun-aleyh olan üç bin akçe mehr-i müeccelim ve nafaka-i iddet-i ma‘lûme ve me’ûnet-i süknâm mukābelelerinde beynimizde ma‘lûm câriye bahâsından zimmetinde olan üç yüz akçe ki, min-haysi’l-mecmû‘ üç bin dokuz yüz otuz akçe hakkımı mezbûr Ahmed Çelebi yedinden tamâmen ahz u kabz edip zevciyyete müte‘allika da‘vâdan her birimiz âharın zimmetini ibrâ-i ve iskāt[ı-âm] ile ibrâ ve iskāt eyleyip, birbirimiz ile kat‘â da‘vâ ve nizâ‘ımız kalmadı dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min Cumâdelâhire li sene isneteyn ve mi’e ve elf. Şuhûdü’l-hâl: Mehmed Çelebi b. Abdullah, Süleyman Efendi b. Ali, İbrahim Çelebi b. Ahmed, Mehmed Çelebi b. Hüseyin, Ahmed b. Şaban, İbrahim Çelebi b. Mehmed, Kasab el-Hâc Hasan, Abdülbâki Beşe, el-Hâc Mehmed.