Bab Mahkemesi 54 Numaralı Sicil (H. 1102 / M. 1691) cilt: 20, sayfa: 191 Hüküm no: 210 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Abdullah’ın mühtedî Hasan’da olan alacak iddiasını ispat edemediği Mahrûse-i [Edir]ne’de el-Hâc Safâ mahallesinde sâkin olan Mustafa Ağa b. Abdullah b. Abdurrahman tarafından husûs-ı âti’l-beyâna vekîl olduğu İbrahim Beşe b. Yusuf ve Mehmed Beşe b. Abdullah şehâdetleriyle şer‘an [vekâleti] sâbite olan Rüstem b. Abdullah meclis-i şer‘-i şerîf-i enverde, mahmiye-i İstanbul’da Balatkapısı kurbunda sâkin Kazancı Heyder v. Refail nâm Yahudi muvâcehesinde üzerine bi’l-vekâle da‘vâ ve takrîr-i kelâm edip, müvekkilim mezbûr Mustafa Ağa’nın târih-i kitâbdan altı sene mukaddem Françe tercümanlarından olup zimmî iken Sefer ismi ile müsemmâ olup, ba‘dehû İslâmla müşerref olan Hasan nâm mühtedî zimmetinde cihet-i karzdan ve eşyâ bahâsından cem‘an bin yüz guruş hakkı olmağla, meblağ-ı mezbûr bin yüz guruşu târih-i mezkûrda mahrûse-i mezbûrda merkūm Heyder kefâlet-i sahîha-i şer‘iyye ile bi’l-emr ve’l-kabûl kefîl olmuşdu. Hâlâ mezbûr Heyder’e suâl olunup kefâletine binâ’en meblağ-ı mezbûr bin yüz guruşu müvekkilim mezbûr Mustafa Ağa için bana edâ ve teslîme tenbîh olunmak matlûbumdur dedikde, gıbbe’s-suâl ve akībe’l-inkâr, müdde‘î-i mezbûrdan sıdk-ı makāline mutâbık beyyine taleb olundukda, ityân-ı beyyine için istimhâl etmekle, defe‘âtle mehl-i şer‘î verilip müddet-i mehil münkaziye olup ve müdde‘î-i mezbûr Rüstem ityân-ı beyyineye kādir olmayıp istihlâf dahi etmemeğin, mûcebince müdde‘î-i mezbûr bilâ-beyyine mu‘ârazadan men‘ olunup, mâ vaka‘a bi’t-taleb ketb ve imlâ olundu. Fi’l-yevmi’s-sâlis min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Mustafa b. Şaban, İbrahim Çelebi b. Mehmed, Ali Efendi b. Safâ.