Bab Mahkemesi 54 Numaralı Sicil (H. 1102 / M. 1691) cilt: 20, sayfa: 196 Hüküm no: 216 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamal Fazlullah b. Şaban’ın alacak davasının reddi Hamal tâifesinden olup mahmiye-i İstanbul’da Haydarpaşa mahallesinde sâkin Fazlullah b. Şaban nâm kimesne meclis-i şer‘-i şerîf-i enverde, işbu bâ‘isü’l-vesîka Hasan b. Abdullah mahzarında üzerine da‘vâ ve takrîr-i kelâm edip, bundan akdem hamal tâifesinden taraf-ı saltanat-ı aliyye’den kürekçi bedeli fermân olunmakla, meblağ-ı ma‘lûmü’l-mikdâr bedel-i mezbûr beynlerinde tahammüllerine göre tevzî‘ ve taksîm eylediklerinde cümlenin izniyle mezbûr Hasan tarafından vekâleten meblağ-ı maksûm-ı mezbûru cem‘ ve tahsîl ve mahalline teslîm etmeğin, ben dahi hisseme isâbet eden iki guruşu yedimden ahz ve mahalline vermeyip kendi mesârifine sarf etmekle zimmetinde hakkım kalmağın, hâlâ merkūm Hasan’a suâl olunup meblağ-ı mezbûr iki guruşu bana red ve teslîme tenbîh olunmak matlûbumdur dedikde, gıbbe’s-suâl merkūm Hasan cevâbında, müdde‘î-i mezbûrdan ber vech-i muharrer iki guruşu ahz ve mahalline teslîm eyledim deyu zimmetinde kaldığını inkâr edicek, müdde‘î-i mezbûrdan da‘vâsına mutâbık beyyine taleb olundukda ityân-ı beyyineden izhâr-ı acz edip istihlâf etmeğin, mezbûr Hasan kabzını i‘tirâf eylediği iki guruşu ber vech-i meşrûh mahalline verip zimmetinde ol vechile müdde‘î-i mezbûre iki guruş hakkı kalmadığına yemîn teklîf olundukda, ol dahi alâ vefki’l-mes’ûl yemîn bi’llahi te‘âlâ etmeğin, mûcebince müdde‘î-i mezbûr bilâ-sebeb bî-vech mu‘ârazadan men‘ olunup, mâ vaka‘a bi’t-taleb ketb olundu. Fî gurreti Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Mehmed b. Ahmed, Ahmed b. Ahmed.