Bab Mahkemesi 54 Numaralı Sicil (H. 1102 / M. 1691) cilt: 20, sayfa: 195 Hüküm no: 215 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Vakkas’ın kaybolan atının kendisine iadesi Mahmiye-i İstanbul’da Mi‘mâr Sinan mahallesi sükkânından işbu râfi‘ü’l-kitâb Ali b. Abdullah nâm kimesne meclis-i şer‘-i şerîf-i enverde, Yusuf Ağa b. Abdullah nâm kimesne tarafından husûs-ı âti’l-beyâna vekîl olduğu Hüseyin Çavuş b. Abdürrezzak ve Ömer b. Abdülkādir şehâdetleriyle şer‘an sâbite ve sübût-ı vekâletini ilm-i şer‘î lâhık olan Ali b. Hüseyin nâm kimesne mahzarında üzerine da‘vâ ve takrîr-i kelâm edip, işbu meclis-i şer‘de mevcûd ve müşâhed ve vekîl-i mezbûr yedinde olan bir re’s iğdiş Bârgir mülküm olup târih-i kitâbdan dört ay mukaddem mahmiye-i mezbûrede Sultan Bayezid Câmi‘-i şerîfi kurbunda vâki‘ Vezneciler Kapısı’nda mülkünden zâyi‘ olmuşdu. Hâlâ müvekkil-i mezbûr mârru’z-zikr Bârgire bi gayri hakkın fuzûlen vaz‘-ı yed eder, suâl olunup müvekkil-i mezbûrun kasr-ı yedine ve vekîl-i merkūma Bârgir-i mezbûrun bana teslîme tenbîh olunması matlûbumdur dedikde, gıbbe’s-suâl mezbûr cevâbında, müvekkilim mezbûr Yusuf Ağa zikr olunan Bârgiri târih-i kitâbdan yirmi gün mukaddem canbâz tâifesinden el-Hâc Mehmed b. Derviş nâm kimesneden üç bin beş yüz akçe semen-i medfû‘a iştirâ ve kabz edip mülk-i müşterâsı olmak üzre vaz‘-ı yed eder, müdde‘î-i mezbûrun vech-i muharrer üzre mülkünden zâyi‘ olduğu ma‘lûmum değildir deyicek, müdde‘î-i mezbûrdan müdde‘âsını mübeyyine beyyine taleb olundukda, udûl-i müslimînden el-Hâc Ahmed Çelebi b. Osman ve Hasan b. Abdullah nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka işbu meclis-i şer‘de mevcûd ve müşâhed vekîl-i mezbûr yedinde olan bir re’s kır iğdiş Bârgir müdde‘î-i mezbûrun mülkü olup târih-i kitâbdan dört ay mukaddem mahmiye-i mezbûrede Sultan Bayezid Câmi‘-i şerîfi kurbunda vâki‘ Vezneciler Kapısı kurbunda mülkünden zâyi‘ olmuşdu. Biz bu husûsa bu vech üzre şâhidleriz, şehâdet dahi ederiz deyu her biri şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın, müdde‘î-i mezbûr tahlîf-i şer‘î ile tahlîf olundukdan sonra mûcebince zikr olunan Bârgiri müdde‘î-i mezbûre edâ ve teslîme vekîl-i mezbûre tenbîh birle, mâ vaka‘a bi’t-taleb ketb olundu. Fi’l-yevmi’r-râbi‘ min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Mustafa b. Şaban, Abdullah Efendi el-kâtib, Ahmed b. Ahmed.