Bab Mahkemesi 54 Numaralı Sicil (H. 1102 / M. 1691) cilt: 20, sayfa: 197 Hüküm no: 218 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Angoli v. Yani’nin menzilini Dimitri v. Palaş’a satması Havâss-ı Aliyye kazâsına tâbi‘ Ayapa nâm karye sükkânından olup, mahmiye-i İstanbul’da Kiremitçi mahallesinde sâkin Angoli v. Yani nâm zimmî meclis-i şer‘-i şerîf-i enverde, işbu bâ‘isü’s-sifr Dimitri v. Palaş muvâcehesinde ikrâr ve takrîr-i kelâm edip, akd-i âti’z-zikrin sudûruna değin yedimde mülk ve hakkım olup, karye-i mezbûrede vâki‘ bir tarafdan Ali Çelebi mülkü ve bir tarafdan Dimitri mülkü ve iki tarafdan tarîk-i âm ile mahdûd fevkānî ve tahtânî iki bâb oda ve havlu ve bir mikdâr bahçeyi müştemil mülk menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık Dimitri’ye on bir guruşa tarafeynden îcâb ve kabûlü hâviye ve şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm, ol dahi ber vech-i muharrer iştirâ ve tesellüm ve temellük ve kabûl ettiğinden sonra semeni olan meblağ-ı mezbûr on bir guruşu mezbûr Dimitri yedinden bi’t-tamâm ve’l-kemâl ahz u kabz edip, ba‘de’l-yevm menzil-i mahdûd-ı mezkûru mahallinde zabt ve tasarrufa mezbûr Dimitri’yi taslît eyledim. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Şuhûdü’l-hâl: İbrahim Çelebi b. Ahmed, Mehmed b. Hasan, Ahmed b. Ahmed, Hüseyin b. Abdullah, Yani v. Miço, Yamandi v. Bağdasar, Yuvan v. Niko, Râhib Papaz.