Bab Mahkemesi 54 Numaralı Sicil (H. 1102 / M. 1691) cilt: 20, sayfa: 197 Hüküm no: 219 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın tereke tahsili için Mehmed Beşe b. Ahmed’i vekil tayin etmesi Fi’l-asl vilâyet-i Anadolu’da medîne-i Tokat ahâlîsinden olup, mahmiye-i İstanbul’da Âşık Paşa mahallesinde mutavattın oldukdan sonra vefât eden Nasuh b. Yusuf b. Abdurrahman’ın zevce-i menkûhası Fâtıma bt. Abdullah nâm hâtun zâtını ma‘rifet-i şer‘iyye ile ârifân olan Abdurrahman b. Mustafa ve Mehmed b. Ahmed ta‘rîfleriyle mu‘arrefe oldukdan sonra meclis-i şer‘-i şerîf-i enverde, işbu bâ‘isü’l-kitâb Mehmed Beşe b. Ahmed mahzarında takrîr-i kelâm ve ta‘bîr ani’l-merâm edip, zevce-i müteveffâ-yı mezbûr Nasuh zimmetinde mütekarrir ve ma‘kūdun aleyh olan yedi bin akçe mehr-i müeccelim ve medîne-i mezbûrede sâir veresesi yedlerinde olan menzil ve sâir metrûkâtdan hisse-i irsiyemi vaz‘-ı yed edenlerden taleb ve da‘vâ ve ahz u kabz ve bana îsâle ve husûs-ı mezbûr mütevakkıf olduğu umûrun cümlesine mezbûr Mehmed Beşe’yi tarafımdan vekîl ve nâib-i menâb nasb ve ta‘yîn eyledim dedikde, ol dahi vekâlet-i mezbûreyi kabûl ve hizmet-i lâzımesin kemâ-yenbağī edâya ta‘ahhüd etmeğin, işbu vesîka bi’t-taleb ketb olundu. Fi’l-yevmi’s-sânî min Cumâdelâhire li sene isneteyn ve mi’e ve elf. Şuhûdü’l-hâl: Ahmed Ağa b. Abdi, Ahmed b. Sefer, Ahmed b. Ali, Ahmed b. Süleyman ve gayruhüm.