Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 311 Hüküm no: 332 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban b. Rıdvan’ın eski vasisi Mustafa Efendi b. Hasan elindeki eşya ve paraları yeni vasi Hoca Bayram b. Mehmed’e verdiği Bundan akdem mahmiye-i Kostantıniyye’de Peykhâne mahallesinde müteveffâ olan merhûm Hoca Resul b. Burhan nâm tâcirin li-ebeveyn kız karındaşı oğlu ve zûrahîm olduğu cihetden vârisi olan Şaban b. Rıdvan nâm sagīrin vasiyy-i şer‘îsi olup vech-i şer‘î üzere vesâyeti sâbite olan Hoca Bayram b. Mehmed nâm tâcir mahfil-i şer‘-i hatîrde sagīr-i merkūmun sâbıkā vasiyy-i şer‘îsi olan bâ‘isü’l-kitâb umdetü kuzâti’l-islâm Mevlânâ Mustafa Efendi b. Hasan muvâcehesinde bi’l-vesâye ikrâr ve takrîr-i kelâm edip merhûm-ı mezbûr fevt olduğunda müşârun-ileyh Mustafa Efendi cânib-i şer‘den sagīre-i mezbûre vasî nasb ve ta‘yîn olunmağla müşârun-ileyh Mustafa Efendi’nin müteveffâ-yı mezbûrun muhallefâtından sagīr-i merkūm için her dengi ikişer yüz kâmil guruşa olmak üzere on bin iki yüz guruş kıymetli beynimizde cinsi ma‘lûm altmış bir denk sof ile kâmil bin nakid guruş makbûzu olup zikr olanan bin kâmil guruşdan iki yüz elli guruşunu izn-i hâkim ile müteveffâ-yı mesfûrun düyûn-ı müsbite ve sâir mühimmât-ı lâzımesine harc ve sarf edip zikr olunan altmış bir denk sof ile yedi yüz kırk beş guruş yedinde kalmış idi hâlâ müşârun-ileyh Mustafa Efendi vesâyet-i merkūmeden fâriğ olup sagīr-i mezkûra kıbel-i şer‘den ben vasî nasb ve ta‘yîn olunmağın ber vech-i meşrûh müşârun-ileyhin makbûzu olan zikr olunan altmış bir denk sof ile yedi yüz kırk beş kâmil guruşu ve kassâm defterlerinde mastûr olup makbûzu olan eşyâyı bi’t-tamâm sagīr-i mersûm için vesâyetim hasebiyle bi’t-tamâm ve’l-kemâl müşârun-ileyh Mustafa Efendi’nin yedinden alıp kabz eyledim ba‘de’l-yevm müşârun-ileyh Mustafa Efendi’nin yedinde sagīr-i mezbûrun mâlından bir akçe ve bir habbe kalmadı dedikde gıbbe’t-tasdîk mâ-hüve’l-vâkı‘ bi’t-taleb ketb olundu. Hurrire fî-evâhiri şehri’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Fahrü’l-müderrisîn Mevlânâ İshak Efendi b. Ahmed, Zahrü’l-müderrisîn Mevlânâ Mahmud Efendi el-kassâmü’l-askeri bi’l-mahkemeti’l-mezkûre, Molla demekle şehîr el-Hâc Yusuf b. Ahmed et-tâcir, Umdetü kuzâti’l-islâm Mevlana İbrahim Efendi b. Süleyman, Mevlana Abdurrahman Efendi b. Mirza, Derviş Ali b. et-tâcir, Mehmed b. Mustafa, Hasan b. Şaban ve gayruhüm.