Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 312 Hüküm no: 333 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mansur b. Şevk’in Hicazî Mehmed Çavuş b. İvaz‘ı dövdüğünün tespiti Bâ‘isü’l-kitâb fahrü’l-cüyûş Hicazî Mehmed Çavuş b. İvaz mahfil-i şer‘-i hatîrde Mansur b. Şevk nâm kimesne mahzarında üzerine takrîr-i da‘vâ edip mezbûr Mansur işbu târih-i ketâb-ı şehrînin yirmi beşinci [günü] vâki‘ olan Perşembe günü mahmiye-i Kostantıniyye’de Unkapanı kurbünde Kazgancılar Çarşısı’nda bi-gayrı hakkın tabanca ve yumruk ile beni darb eyledi suâl olunmak taleb ederin dedikde gıbbe’s-suâl ve’l-inkâr ve akībe’l-istişhâd udûl-i müslimînden Ahmed Çavuş b. Süleyman ve Hüseyin Çavuş b. Abdullah ve el-Hâc Mehmed b. ez-zehar et-tâcir li-ecli’ş-şehâde hâzırûn olup fi’l-hakīka merkūm Mansur yevm-i mezbûrda mevzı‘-ı mezkûrda bizim huzûrumuzda mezbûr Hicazi Mehmed Çavuş’u bi-gayrı hakkın tabanca ve yumruk ile darb eyledi bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde ba‘de ri‘âyet-i şerâiti’l-kabûl şehâdetleri makbûle olup mâ vaka‘a gıbbe’t-taleb ketb ve tahrîr olundu, Hurrire fî-evâhir-i şehri’l-Muharremi’l-harâm li-sene erba‘a ve selâsîn ve elf. Şuhûdü’l-hâl: İbrahim Çavuş b. ( ), Ahmed Çavuş b. Süleyman, es-Seyyid Mehmed Çavuş, Abdi Çavuş b. ( ), Yusuf Çavuş b. Nesimi, Mehmed Çavuş b. Abdullah.