Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 315 Hüküm no: 336 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç Ali Bey Vakfı’ndan olan menzilin Mücella bt. Abdullah’a devredildiği Bundan akdem Mahmiye-i Kostantıniyye’de Eski İmaret mahallesinde müteveffâ olan Razıye Kadınzâde demekle ma‘rûf merhûm Mustafa Paşa’nın sulbî oğlu umdetü’l-ümerâi’l-kirâm Mehmed Bey ve sulbiye kızı umdetü’l-muhadderât Rukiye Hanım taraflarından ikrâr-ı âtîye vekîl olup mahzar-ı hasm-ı şer‘îde Mevlânâ Ali Efendi b. Mehmed ve Mevlânâ Mehmed b. Süleyman ve Mustafa Bey b. Murad Efendi şehâdeteriyle şer‘an vekâleti sâbite olan zahrü’l-eşbâh Mehmed Çavuş b. Abdullah mahfil-i şer‘-i hatîrde işbu bâ‘isetü’l-kitâb Mücella bt. Abdullah nâm hatun tarafından tasdîk-i âtîye vekîl olup vech-i şer‘î [üzere] vekâleti sâbite olan Mevlânâ Ali Efendi b. Mehmed muvâcehesinde bi’l-vekâle ikrâr-ı tâm ve takrîr-i kelâm edip merhûm Serrâc Ali Bey Vakfı’ndan olup mahalle-i merkūmede vâki‘ tarafeyni zümre-i kuzâtdan Kebabî Ali Efendi mülküne ve tarafeyn-i âhareyni tarîk-i hâssa müntehî ve muhavvata-i dâhiliyyesi bir beyt-i süflâyı ve iki bâb beyt-i ulvîyi ve bir ıstablı muhtevî olan menzil mukaddemâ ücret-i mu‘accele ve yevmî iki akçe ücret-i müeccele ile müşârun-ileyh Mustafa Paşa’nın taht-ı icâre ve tasarrufunda olup fevt olduğunda hakk-ı tasarrufu bi-hasebi’l-kānûn ale’l-iştirâki’s-seviy müvekkillerim mezbûrân Mehmed Bey ve Rukiye Hanım’a intikāl etmeğin mezkûrân Mehmed Bey ve Rukiye Hanım ber vech-i meşrûh zikr olunan menzilde olan hakk-ı tasarruflarını vakf-ı mezbûra bi’l-fi‘l mütevellî olan Ali Bey b. Mehmed ma‘rifetiyle mezkûre Mücella Hatun’a seksen bin akçe bedel-i tefvîz ile tefvîz ve teslîm edip ol dahi tefevvüz ve tesellüm eyledikden sonra bedel-i tefvîz olan meblağ-ı mezbûr seksen bin akçeyi bi‘t-tamâm ve’l-kemâl merkūme Mücella Hatun’un yedinden alıp kabz eylediler ba‘de’l-yevm keyfe [mâ] yeşâ tasarruf eylesin dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Tahrîren fî-evâili’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Ahmed Efendi b. Zeynelabidin el-müderris, Ali Efendi b. Mehmed el-müderris, Ahmed Bey b. Abdullah el-cündî, Mustafa b. Murad, Gazanfer Ağa b. Abdullah el-müteferrika, Ahmed Ağa b. Muhzıran-ı Rûm.