Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 314 Hüküm no: 335 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Mustafa’nın Terzi Kemal’in vakfı olan menzilin tasarruf hakkını Kabil Mehmed Bey b. Kasım’a sattığı Mahmiye-i Kostantıniyye sükkânından fahrü’l-eimme Mevlânâ Mustafa Efendi b. Mustafa mahfil-i şer‘-i hatîrde işbu bâ‘isü’l-kitâb hâssa helvacılardan fahrü’l-eşbâh Kabil Mehmed Bey b. Kasım muvâcehesinde ikrâr-ı tâm ve takrîr-i kelâm edip mahmiye-i mezbûrede Emin Sinan mahallesinde vâki‘ tarafeyni Mehmed Çelebi b. İlyas Ağa mülkü ile Hüsni Hatun Vakfı’na ve tarafeyn-i âhareyni merhûm Hamza Paşa kerîmesi mülkü ile tarîk-i âmma müntehî olup mâliki olan merhûm Terzi Kemal nâm sâhibü’l-hayr vakf edip gallesini mahalle-i mezbûre imâmına yevmî bir cüz’-i şerîf tilâvetiʼçün şart ve ta‘yîn eylediği menzil bundan akdem ücret-i mu‘accele-i ma‘lûme ve yevmî yedi akçe ücret-i müeccele ile taht-ı îcâra ve tasarrufumda iken menzil-i mezbûr bi’l-külliye harâb olup tecdîd ve ta‘mîrine taraf-ı vakıfdan müsâ‘ade olunmamağın menzil-i mezbûru ücret-i mu‘acceleye mahsûb olmak üzere kendi mâlım ile ta‘mîr edip ve nefsim için mâlımla bina ihdâs etmeğe hâkimü’l-vakt tarafından ve vakf-ı mezbûr mütevellîsi olan Ali Efendi b. Abdünnebi tarafından izin verildikden sonra ben dahi kendi mâlım ile muhavvata-i hâriciyyesinin tabaka-i süflâsında müceddeden üç bâb terzi dükkânı ve bir kenîf ve tabaka-i vüstâsında bir oda ve bir sofa ve bir kenîf ve tabaka-i ulyâsında bir oda ve bir sofa ve bir kameriye ve bir tahta bend ve muhavvata-i dâhiliyyesinin tabaka-i süflâsında bir sofa ve bir matbah ve iki kenîf binâ edip ve iki oda ta‘mîr edip ve tabaka-i vüstâsında bir sofa ve tabaka-i ulyâsında bir kilâr binâ ve ihdâs etmişdim el-hâletü hâzihî zikr olunan ebniye-i memlûkemi mezbûr Kabil Mehmed Bey’e fıddî râyic fi’l-vakt iki yüz bin akçeye bey‘-i kat‘î ile bey‘ edip kabz-ı semen ve teslîm-i mebî‘ eylediğimden sonra arsasının dahi hakk-ı tasarrufunu yine bi’l-fi‘il evkāf-ı mezbûr mütevellîsi olan mezkûr Ali Efendi izin ve ma‘rifetiyle mezbûr Kabil Mehmed Bey’e tefvîz eyledim ba‘de’l-yevm keyfe mâ yeşâ tasarruf eylesin dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Tahrîren fî-evâhiri’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Umdetü’l-meşâyıh eş-Şeyh Ali Efendi b. Mehmed el-Kudsi, fahrü’l-eimme Mevlânâ Ali Efendi b. Abdi, zahrü’l-eimme Mevlânâ Muslihiddin Efendi, Mevlânâ Mehmed Efendi b. Kamil, Mevlânâ Ali Efendi b. Musa, Kemal Dede b. Abdülkādir. fahrü’s-sâde es-Seyyid Ali Çelebi b. Mehmed, zahrü’s-sâde es-Seyyid Nesimi Efendi b. Mirza, Davud Halife b. Alâeddin, el-Hâc Hüseyin b. Abdullah el-müezzin, Mehmed Rıza Çavuş b. ( ), Salih Ağa b. Abdülmennân, Ali Ağa b. Mustafa, Mustafa Çelebi b. Mehmed, Hüseyin Çelebi b. Hüseyin, el-Hâc Halil b. Habil, Mustafa b. Muhzır el-bârî, Mehmed Çelebi b. Hızır el-muhzır, Mehmed b. Himmet el-kilari, İbrahim b. Mahmud, Ömer Çelebi el-kilari, Abdülkādir b. Nasuh ve gayruhüm.