Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 316 Hüküm no: 338 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. el-Hac Hızır’ın eski kocası Hatibzâde Mehmed Efendi ile mehir davasında sulh oldukları Mahrûse-i Bursa’da Veled-i Harrat mahallesi sâkinelerinden Fâtıma bt. el-Hâc Hızır nâm hatun mahfil-i şer‘-i hatîrde sâbıkā zevci olan zahrü’l-kuzât Hatibzâde Mevlânâ Mehmed Efendi b. Mehmed mahzarında bi-tav‘ihâ ikrâr ve i‘tirâf edip mezbûr Mehmed Efendi zimmetinde ma‘kūdün-aleyh olan mehr-i müeccelimden elli bin akçe hakkım olup ve bir salkım küpemi on bin akçeye bey‘ edip ve bir siyâh tuğumu dahi üç bin akçeye bey‘ edip semenlerini kabz ve kendi mesârifine sarf etmeğle mehr-i mü’eccelimden ve zikr olunan küpe ve tuğ bahâsından zimmetinde altmış üç bin akçe hakkım olmağın meblağ-ı mezbûrun cümlesini taleb ve da‘vâ eylediğimde merkūm Mehmed Efendi dahi bundan akdem mahrûse-i mezbûrede senin tarafından hul‘a nehc-i şer‘î üzere sâbitü’l-vekâle vekîlin olan vâliden Kerime bt. Mehmed Çavuş nâm hatun mehr-i müeccel-i mezkûr üzerine bi’l-vekâle benimle hul‘ edip ve bedel-i hul‘ı yedimden iki bin beş yüz akçe alıp kabz eyledi deyip ve zikr olunan küpe ve tuğdan haberim yokdur deyü inkâr edip beynimizde münâza‘ât-ı kesîre vâkı‘a olmuş idi el-hâletü hâzihî tavassut-ı muslihîn ile an inkâr üç bin nakd-i râyic fi’l-vakt fıddî akçe üzerine akd-i sulh-i sahîh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm üç bin akçeyi merkūm Mehmed Efendi’nin yedinden bi’t-tamâm ve’l-kemâl kabz edip zimmetini mehr-i müeccel-i mezkûra ve zikr olunan küpe ve tuğa müte‘allık cemî‘ de‘âvî ve husûmâtdan ibrâ eyledim ba‘de’l-yevm husûs-ı mezkûra müte‘allık benden bi’z-zât [ve]yâ bi’l-vâsıta da‘vâ südûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîk vicâhen mâ vaka‘a bi’t-taleb ketb olundu. Tahrîren fî-evâsıtı’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Kıdvetü’l-ulemâi’l-kirâm Şah Mehmed Efendi eş-şehîr bi-Fenarizade, Umdetü’l-müderrisîn zahrü’l-müdakkıkîn Şeyhi Efendi el-ma‘rûf bi-Fenarizade, Kıdvetü’l-kuzât Mevlânâ Mehmed Efendi eş-şehîr bi-Haleblizade, Mevlânâ Abdülfettâh Efendi b. Abdurrahman el-Bursevî, Hasan b. Şaban, Nuh b. Arslan, Mehmed b. Mustafa ve gayruhüm.