Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 317 Hüküm no: 339 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın Ebubekir Bey b. Mehmed’e olan borcunu edaya tenbih olunduğu Sâbıkā Ergani sancağı beyi olan fahrü’l-ümerâi’l-kirâm Ebûbekir Bey b. Mehmed mahfil-i şer‘-i hatîrde Hasan b. Abdullah nâm kimesne mahzarında üzerine takrîr-i da‘vâ edip târih-i kitâb senesi şehri Ramazânında merkūm Hasan’a çeki ta‘bîr olunan her yüz dirhemi ikişer bin fıddî akçeye olmak üzere sarf tarîkiyle kırk sekiz bin fıddî akçeye yirmi dört çeki fıddî Osmanî bey‘ u teslîm edip ol dahi iştirâ ve kabz etmiş idi lâkin ben zikr olunan kırk sekiz bin akçeyi kabz etmeyip kable’l-kabz iftirâk ile akd-i mezkûr fâsid olmağın mevcûd ise makbûzunu hâlik ise mislini taleb ederim dedikde gıbbe’s-suâl merkūm Hasan bi’l-külliye inkâr edip müdde‘î-i mezbûrdan da‘vâ-yı meşrûhasını mübeyyin beyyine taleb olundukda udûl-i müslimînden kasaba-i Beşiktaş sükkânından Mevlânâ Esad Efendi b. Mustafa el-müderris ve Molla Gürani mahallesinden Hasan b. İsa li-ecli’ş-şehâde hâzırân olup fi’l-hakīka mîr-i müşârun-ileyh merkūm Hasan’a şehri mezbûrda her çekisi ikişer bin fıddî akçeye olmak üzere kırk sekiz bin fıddî akçeye yirmi dört çeki fıddî Osmanî bey‘ u teslîm edip ol dahi bizim huzûrumuzda alıp kabz eyledi bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olup mûcebiyle mevcûd ise makbûzunu hâlik ise mislini red ve ibkāya merkūm Hasan’a tenbîh olundu. Tahrîren fî-evâhiri Zilhicceti’l-harâm li-sene selâse ve selâsîn ve elf. Şuhûdü’l-hâl: Hüseyin b. Yunus, Süleyman Beşe b. Mehmed, Ahmed Bey b. Memi, Memed b. Mustafa.