Bab Mahkemesi 54 Numaralı Sicil (H. 1102 / M. 1691) cilt: 20, sayfa: 200 Hüküm no: 223 Orijinal metin no: [36a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ali’nin eski kocası Dede Mehmed Halife b. Abdullah ile mehir ve nafaka davasında sulh olduğu Mahmiye-i İstanbul’da Davud Paşa mahallesi sâkinelerinden olup zâtını ma‘rifet-i şer‘iyye ile ârifân olan Mesud Efendi b. Mehmed ta‘rîfleriyle mu‘arrefe olan Hatice bt. Ali nâm hâtun meclis-i şer‘-i şerîf-i enverde, zevc-i sâbıkı işbu sâhibü’l-kitâb Dede Mehmed Halîfe b. Abdullah mahzarında ikrâr ve takrîr-i kelâm edip, mezbûr Dede Mehmed zevcim olup beni tatlîk etmekle zimmetinde mütekarrir ve ma‘kūdun aleyh olan bin akçe mehr-i müeccelimi ve nafaka-i iddet-i mu‘ayyenem için kadr-i ma‘rûf nafaka taleb ve da‘vâ eylediğimde, ol dahi cevâbında sen benimle mehr-i müeccelin olan meblağ-ı mezbûr ve nafaka iddet-i mu‘ayyene-i ma‘lûmeyi ve me’ûnet-i süknân dahi kendi üzerine olmak üzre muhâla‘a-i sahîha-i şer‘iyye ile muhâla‘a olmuşdun demekle, beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûrumdan beni mezbûr Dede Mehmed ile yedi yüz akçe üzerine sulh eylediklerinde, ben dahi meblağ-ı mezbûru kabûl ve bedel-i sulh olan meblağ-ı mezbûr yedi yüz akçeyi mezbûrun yedinden tamâmen ahz u kabz edip, fîmâ-ba‘d mehr-i mezbûr ve nafaka-i iddet-i ma‘lûme ve me’ûnet-i süknâm da‘vâsından ve bi’l-cümle hukūk-ı zevciyyete müte‘allika târih-i kitâba gelince âmme-i da‘vâdan mezbûrun zimmetini ibrâ-i âmm-ı râfi‘ü’l-hisâm ile ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Cumâdelâhire sene 1102. Şuhûdü’l-hâl: Mehmed Çelebi b. Hüseyin, Mehmed Çavuş b. Abdullah, Arab Hüseyin (…), (…) b. Mehmed ve gayruhüm.