Bab Mahkemesi 54 Numaralı Sicil (H. 1102 / M. 1691) cilt: 20, sayfa: 200 Hüküm no: 222 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. İsa’nın tarla ve bahçesini Ahmed Efendi b. Ali’ye kiraya vermesi Vilâyet-i Anadolu’da Bolu sancağında Eflani kazâsına tâbi‘ Afşar-ı Örencik nâm karye sükkânından Mehmed Çelebi b. İsâ meclis-i şer‘-i şerîf-i enverde, yine karye-i mezbûrede sâkin işbu bâ‘isü’l-kitâb Ahmed Efendi b. Ali mahzarında ikrâr ve takrîr-i kelâm edip, taht-ı tasarrufumda olup karye-i mezbûre sınırı dâhilinde mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd sekiz kıt‘a tarlamı ve bir kıt‘a mülk bahçemi safka-i vâhide ile beher sene üç keyl buğday ve üç keyl şa‘îr olmak üzre târih-i kitâbdan yedi sene tamâmına değin yirmi bir keyl buğday ve yirmi bir keyl arpaya merkūm Ahmed Efendi’ye îcâr-ı sahîh ile îcâr edip, ol dahi vech-i meşrûh üzre istîcâr ve kabûl ettiğinden sonra mârru’z-zikr sekiz kıt‘a tarlamı ve bir kıt‘a bahçemi mahallinde kabz ve tasarrufa merkūm Ahmed Efendi’yi taslît eyledim dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelâhire li sene isneteyn ve mi’e ve elf. Şuhûdü’l-hâl: Fahrü’l-kuzât Abdülaziz Efendi b. Fazlullah Efendi, Ali Bey b. Abdi, Mehmed Çelebi b. Zülfikar, Ahmed Çelebi b. Abdülaziz Efendi, Ali Çelebi b. Abdüsselâm Efendi, Mehmed Çelebi b. Hasan.