Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 326 Hüküm no: 349 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa b. Mahmud’un fırınını işletmek için Velo v. Liyo’ya verdiği paraları geri istediği Habbâz tâifesinden bâ‘isü’l-kitâb Musa b. Mahmud nâm kimesne mahfil-i şer‘-i hatîrde yine tâife-i mezbûreden Velo v. Liyo nâm zimmî mahzarında üzerine da‘vâ edip târih-i kitâbdan bir yıl mukaddem ben medyûn olmağla deyn için sicn-i sultânîde mahbûs iken mezkûr Velo ecîrim olmağın fırınımı işledip levâzım ve mühimmâtına sarf etmek için mezkûr Velo’ya mâlımdan her biri otuz akçeye râyic olan beş yüz fıddî Osmanî def‘ u teslim etmiş idim ol dahi zikr olunan beş yüz Osmanîyi benim yedimden alıp kabz edip emrim üzere dükkânımın levâzımına sarf etmeyip kendi mesârifine sarf ve itlâf etmeğle meblağ-ı mersûm zimmetinde deyn olmuşdur taleb ederim dedikde gıbbe’s-suâl mezkur Velo bi’l-külliye inkâr edip müdde‘î-i mezbûrdan da‘vâsını mübeyyin beyyine taleb olundukda udûl-i müslimînden mahmiye-i mezbûrede Soğukkuyu mahallesi sâkinlerinden Mustafa b. Halil et-tâcir ve Mehmed Reis b. Musa nâm kimesneler li-ecli’ş-şehâde hâzırân olup fi’l-hakīka târih-i mesfûrda müdde‘î-i mezbûr deyn için sicnde mahbûs iken bizim huzûrumuzda mezkûr Velo’ya vech-i muharrer üzere kendi fırınının mesârifine sarf etmek için mâlından her biri onar akçeye râyic olan beş yüz Osmaniyi bi-tamâmihî def‘ u teslîm edip mersûm Velo dahi kabz ve tesellüm eyledi bu husûsa şâhidleriz şehâdet dahi ederiz deyü edâ-i şehâdet-i şer‘iyye eyledilerinde gıbbe’t-ta‘dîl ve’t-tezkiye şehâdetleri makbûle olup mûcebiyle edâsına tenbîh olundu. Tahrîren fî-evâhiri’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Ömer Beşe b. Hüseyin er-râcil, Yunus b. Kasım, Davud b. Abdullah, Mustafa Beşe b. Mehmed er-râcil, Ahmed Ağa b. Receb el-bevvâb.