Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 326 Hüküm no: 350 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hac Mustafa Bey b. Abdullah’ın vakfı olan menzilin es-Seyyid Nesimi Efendi’ye tevcih edildiği Mahmiye-i İstanbul’da Dizdarzâde mahallesinde vâki‘ lede’l-ahâlî ve’l-cîrân ma‘lûmü’l-hudûd ve’l-hîtân olup birbirine muttasıl olan üç bâb odanın vasatında olup fevkānî ve tahtânî iki bâb odayı ve bir zîr-i zemîni ve kenîf ve muhavvatayı müştemil olan menzilin süknâsını mâliki olan Dergâh-ı âlî -dâme mahfûfan bi’l-me‘âlî- bevvâblarından el-Hâc Mustafa Bey b. Abdullah nâm sâhibü’l-hayr evvelâ kendüye ve ba‘de vefâtihî sulehâdan süknâya ihtiyâcı olan bir kimesne sâkin olup mukābelesinde kendi rûhiʼçün yevmî bir cüz’-i şerîf tilâvet eyleye deyü vakf ve şart edip hâlâ vâkıf-ı mersûm fevt olup menzil-i mezkûrun süknâsı mahlûle olup işbu hâfızü’l-kitâb mine’s-sülehâ Mevlânâ es-Seyyid Nesîmi Efendi b. es-Seyyid Mirza Salih mütevellî olup süknâya ihtiyâcı müte‘ayyin olmağın menzil-i merkūmun süknâsı merkūm es-Seyyid Nesimi Efendi’ye tevcîh olunup mâ vaka‘a bi’t-taleb ketb olundu. Tahrîren fî-evâili’l-Muharremi’l-harâm li-sene erba‘a ve selâsîn ve elf. Şuhûdü’l-hâl: Mevlânâ Mustafa Efendi b. Mehmed el-ma‘rûf bi-Sufizade, Mevlânâ Abdülkādir Efendi el-imâm, Abdülfettâh Efendi b. el-müsta‘id, Hasan b. Şaban, Mevlânâ Abdi Efendi el-imâm bi-Câmi‘-i Mesih Paşa ve gayruhüm.