Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 337 Hüküm no: 359 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayasofya-i Kebir Evkafı’na ait olup Nesihan Hatun’dan oğlu Ahmed’e intikal eden Tahtakale’deki dükkâna Ali Çelebi tarafından yapılan müdahalenin önlenmesi El-emrü kemâ hurrire fîh, harrerehü’l-fakīr Mehmed b. Abdülganî el-Kādî bi-askeri Rumeli -ufiye anhümâ- Mahmiye-i Kostantıniyye’de Manisalı mahallesinde müteveffât olan Neslihanhatun bt. Hasan Çavuş’un sadrî oğlu hâzır fi’l-meclis Ahmed nâm sagīrin babası ve velîsi olan bâ‘isü’l-kitâb fi’l-cüyûş Hasan Çavuş b. İsa mahfil-i şer‘-i hatîrde mahmiye-i mezbûrede vâkı‘ Ayasofya-i Kebîr Evkāfı’ndan olup âti’z-zikr olan dükkâna hâlâ vâzı‘u’l-yed olduğu nehc-i şer‘î üzere sâbit olan Ali Çelebi b. Ömer nâm kimesne ve evkāf-ı merkūmeye bi’l-fi‘il mütevellî olan fahrü’l-a‘yân Mehmed Ağa b. Mustafa mahzarlarında üzerlerine takrîr-i da‘vâ edip evkāf-ı mezbûreden hâlâ mezkûr Ali Çelebi’nin yedinde olup mahmiye-i mezkûrede Tahtakale kurbünde Kazgancılar Çarşısı’nda vâkı‘ bir tarafı yine evkāf-ı mezbûreden olup Hacı Ali nâm kimesne yedinde olan dükkâna ve bir tarafı İlya Yahudi yedinde olan dükkâna ve bir tarafı vakf-ı mezbûra ve bir tarafı tarîk-i âmma müntehî olup ayda on yedi buçuk akçe ücret-i müeccelesi olan dükkân bundan akdem ücret-i mu‘accele-i ma‘lûme ve ücret-i müeccele-i mersûme ile zevcem mezkûre Neslihan Hatun’un yedinde ve tasarrufunda olup ba‘de vefâtihâ dükkân-ı mezbûrun tasarrufu intikāl-i örfî ile sadrî oğlu sagīr-i mezkûr Ahmed’e intikāl etmiş iken mezbûr Ali Çelebi bi-gayrı hakkın vaz‘ı-yed etmişdir, kasr-ı yedine tenbîh olunmak taleb ederin dedikde gıbbe’s-suâl mezbûr Ali Çelebi cevabında fi’l-hakīka dükkân-ı mezkûr bundan akdem ücreteyn-i ma‘hûdeteyn ile mezbûre Neslihan Hatun’un tasarrufunda olup lâkin bilâ-veled fevt oldukta evkāf-ı mezbûra mütevellîsi tarafından ücret-i mu‘accele ve müeccele ile istîcâr eyledim sagīr-i mezbûr müteveffât-ı merkūmenin sadrî oğlu olup tasarrufu mezbûra intikāl eylediği ma‘lûmum değildir deyü inkâr edip ve mütevellî-i merkūm dahi istintâk olundukta ol dahi sagīr-i mezbûr müteveffât-ı mezkûrenin sadrî oğlu olduğunu inkâr edicek, gıbbe’l-istişhâd udûl-i müslimînden fahrü’l-ulemâ’i’l-kirâm Mehmed Efendi b. Derviş ve Hasan Çavuş b. İdris ve Şa‘ban b. Yunus ve harâir-i nisvân-ı âdilândan Elif bt. Sinan Reis ve Mahıra‘na bt. Abdullah ve Ümmi bt. İsa ve Bedrimah bt. Abdullah li-ecli’ş-şehâde hâzırûn olup fi’l-hakīka sagīr-i mezkûr Ahmed müteveffât-ı mezkûre Neslihan Hatun’dan mütevellid olup mezkûre Neslihan Hatun’un sadrî oğludur, dükkân-ı mezbûrun tasarrufu intikāl-i âdî ile sagīr-i mezbûra intikāl etmişdir, mezbûr Ali Çelebi’nin yedinde bi-gayrı hakkındır, bu husûsa şâhidleriz, şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olup mûcebiyle hüküm olunduktan sonra mezkûr Ali Çelebi’nin dükkân-ı mezkûreden kasr-ı yedine tenbîh olundu. Hurrire fî-evâsıtı şehri’l-Muharremi’l-harâm li-sene erba‘a ve selâsîn ve elf. Şuhûdu’l-hâl: Mehmed Ağa b. Hüseyin, Mesud Çavuş b. Abdullah, Ferruh Çavuş b. Abdullah, Mehmed Çavuş b. Mustafa, Derviş Ali b. Veli, Mustafa b. Mehmed, Ahmed b. İbrahim, el-Hâc Mahmud b. el-Hâc Süleyman, İskender Bey b. Numan ve gayruhüm.