Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 336 Hüküm no: 358 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amid sakinlerinden Melkon v. Karabet’in Erdebil seferinde vefat eden Mesih Çavuş’un terekesinden alacağından varisi Ramazan Ağa’nın haberi olmadığı Medîne-i Âmid sâkinlerinden Melkon v. Karabet nâm Ermeni Dîvân-ı âlî -dâme mahfûfen bi’l-me‘âlî-’de meclis-i şer‘-i hatîrde bundan akdem Erdebil seferinde maktûlen müteveffâ olan Mesih Çavuş b. Hasan’ın li-ebeveyn karındaşı ve hasren vârisi bâ‘isü’l-kitâb fahrü’l-akrân Ramazan Ağa mahzarında üzerine da‘vâ edip müteveffâ-yı mesfûr Mesih Çavuş’un zimmetinde deyn-i şer‘îden yüz bin fıddî akçe hakkım olup zimmetinde iken müteveffâ olup mezbûr Ramazan Ağa hasren vârisi olup tereke-i vâfiyesini kabz etmeğin meblağ-ı merkūmu terekesinden taleb ederim dedikde gıbbe’s-suâl merkūm Ramazan Ağa cevâbında karındaşım merkūm Mesih Çavuş’un vech-i meşrûh üzere mezkûr Ermeniye deyni olduğu ma‘lûmum olmadığından mâ‘adâ karındaşım mesfûr Mesih Çavuş’un terekesinden bir akçe ve bir habbe kabz etmedim deyü inkâr edicek müdde‘î-i mersûmdan da‘vâ-yı meşrûhasını mübeyyin beyyine taleb olundukta ihzâr-ı beyyineden izhâr-ı acz edip yemîn verilmesin taleb eyledikte merkūm Ramazan Ağa dahi vech-i mezbûr üzere mûrisi olan müteveffâ-yı merkūmun müdde‘î-i mezkûra yüz bin akçe deyni olduğunu bilmediğine ve terekesinden bir akçe ve bir habbe kabz etmediğine ba‘de’l-istihlâf yemîn billâhi te‘âlâ eyledikte mâ vaka‘a bi’t-taleb ketb olundu. Tahrîren fî-evâhiri şehri Ramazâni’l-mu‘azzam li-sene selâse ve selâsîn ve elf. Şuhûdu’l-hâl: Ali Çavuş b. Abdullah el-Mübâşir, Yusuf Çavuş b. Abdullah, Ahmed Çavuş b. Abdullah, Ali Çavuş b. Abdullah, Mustafa Bey b. Hüseyin el-Cündî, Emrullah Ağa b. ( ).