Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 338 Hüküm no: 361 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’un Mirahor mahallesinden olup Tırgovişte’de ölen Bali v. Torbalı’nın mirasının varislerine verilmesi Bundan akdem mahmiye-i Kostantıniyye mahallâtından Mirahor mahallesi sükkânından Sürücü tâifesinden olup Eflak diyârında Tirgovişte nâm kasabada mürd olan Bali v. Torbalı nâm zımmînin verâseti sulbî sagīr oğlu Torasi’ye ve vâlidesi Despina bt. Hatar ve zevcesi Despina bt. Ostori nâm Nasrâniyelere münhasıra olduğu zâhir ve mütebeyyen oldukdan sonra sagīr-i mezbûrun vasîsi ve Nasrâniyetân-ı mezbûretânın husûs-ı âtîye vekîli olup vesâyeti ve vekâleti nehc-i şer‘î üzere alâ vechi’l-hasm sâbite olan Murad v. Torbalı nâm zımmî mahfil-i şer‘-i hatîr-i lâzımü’t-tevkīrde Rumeli’nde Eski Zağra nâm kasabada Yeniçeriler serdârı olan Abdülkerim Beşe b. Abdullah mahzarında üzerine bi’l-vesâye ve bi’l-vekâle takrîr-i da‘vâ edip bundan esbak merkūm Bali Eflak diyârına varıp kendi mâlıyla iki yüz yirmi üç reʼs inek ve dokuz reʼs merkeb ve çobana lâzım olan bakraç ve ba‘zı âlât-ı ma‘lûme iştirâ edip bu tarafa getirirken zikr olunan Tirgovişte kasabasında mürd oldukta zikr olunan ineklere ve merkeblere ve âlât-ı ma‘hûdeye kasaba-i mezbûrede emîn-i beytü’l-mâl olan ( ) nâm kimesne vaz‘-ı yed edicek, ben dahi bu tarafda bi’l-vesâye sagīr-i mezkûr merkūm Bali’nin sulbî oğlu olduğunu mezbûretân dahi bu bi’l-asâle vâlidesi ve zevcesi olduklarını ve verâseti mezkûrlara münhasıra olmağla tereke-i mezbûra irs-i şer‘î ile merkūmûna intikāl eylediğini vech-i şer‘î üzere hâkimü’ş-şer‘ huzûrunda isbât edip ba‘dehû emîn-i mezbûrdan muhallefât-ı merkūmeyi ahz u kabza ve bize îsâle Mustafa Beşe b. Abdullah nâm yeniçeriyi ücret-i ma‘lûm ile vekîl eyleyip nakl-i şehâdet ve emr-i şerîf ile irsâl eylediğimizde merkūm Mustafa Beşe dahi ba‘de kabûlü’l-vekâle kasaba-i mezbûreye varıp emîn-i merkūmdan ba‘de’l-hükmi’ş-şer‘î muhallefât-ı merkūmeyi bi-tamâmihâ bi’l-vekâle alıp kabz edip getirirken zikr olunan Eski Zağra kurbünde maktûlen müteveffâ oldukta mezbûr Mustafa Beşe’nin yedinde olup ve merkūm Bali’nin terekesinden olan yüz elli bin akçe kıymetli zikr olunan ineklerine ve merkeblerine ve eşyâ-yı ma‘lûmeye merkūm Abdülkerim Beşe bi-gayrı hakkın gasben vaz‘-ı yed edip âhara bey‘ ile istihlâk etmişdir, kıymet-i meşrûhalarını taleb ederim dedikde gıbbe’s-suâl merkūm Abdülkerim Beşe cevab verip mesfûr Mustafa Beşe maktûlen müteveffâ oldukta ben yeniçeri serdârı olup yeniçeri beytü’l-mâlını kabza meʼmûr olmağın yedinde bulunan zikr olunan inekleri ve merkebleri ve eşyâ-yı mezkûreyi mezbûrun terekesinden olmak zu‘muyla vârisi olmağın kabz edip kassâm-ı askerî ma‘rifetiyle sûk-ı sultânîde bey‘ edip cümlesinin semeninden altmış bin yedi yüz yirmi akçe kabz edip, getirip hâlâ mahmiye-i Kostantıniyye’de Yeniçeri beytü’l-mâlı emîni olup işbu hâzır fi’l-meclis olan fahrü’l-eşbâh Halil Ağa b. Davud’a teslîm eyledim, nehc-i mastûr üzere muhallefât-ı merkūme mezbûr Bali’nin mülkü idüğünü bilmem deyü inkâr edicek, gıbbe’l-istişhâd udûl-i müslimînden Ömer Beşe b. Bâyezid ve Mehmed Beşe b. Abdullah li-ecli’ş-şehâde hâzırân olup fi’l-hakīka merkūm Mustafa Beşe’nin hîn-i vefâtında yedinde bulunup merkūm Abdülkerim Beşe gasben vaz‘ı-yed eylediği zikr olunan inekleri ve merkebleri ve eşyâ-yı ma‘lûmeyi merkūm Mustafa Beşe verese-i mezbûrûn taraflarından bi’l-vekâle nakl-i şehâde ile varıp zikr olunan Tirgovişte kasabasında emîn-i beytü’l-mâl yedinden kabz etmişdir, cümlesi bi-aynihâ merkūm Bali’nin mülk-i mahzı olup irs-i şer‘î ile verese-i merkūmûna intikāl etmişdir, bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olup mûcebiyle mezbûr Abdülkerim Beşe i‘tirâfı üzere makbûzu olan meblağ-ı merkūmu redd ü îfâya hüküm tenbîh olunduktan sonra mezbûr Abdülkerim Beşe dahi merkūm Halil Ağa’ya def‘ ve teslîm eylediği meblağ-ı sâlifü’l-beyânı merkūm Halil Ağa’dan bi’l-müvâcehe istirdâd eyledikde gıbbe’s-suâl mezbûr Halil Ağa dahi ber-vech-i meşrûh merkūm Bali’nin mülkü olup irs-i şer‘î ile verese-i mezbûrûna intikāl eylediği şer‘le sâbit olan a‘yân-ı mezbûrenin semeni olan meblağ-ı merkūmu ber-vech-i meşrûh mezkûr Abdülkerim Beşe yedinden makbûzu olduğuna mu‘terif olmağın merkūm Halil Ağa’ya dahi meblağ-ı mezbûru redd ü teslîme tenbîh olundu. Tahrîren fî-evâili Saferi’l-hayr li-sene erba‘a ve selâsîn ve elf. Şuhûdu’l-hâl: Hasan Bey b. Ali, Ahmed Bey b. Mehmed, el-Hâc Mahmud b. ( ), Ali Bey b. Abdullah el-Bevvâb, Hasan b. Mustafa Çekmeceli, Hasan b. Şa‘ban.