Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 340 Hüküm no: 362 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’un Çakır Ağa mahallesinde vefat eden Mihrinaz’a emaneten bırakılan eşyanın bedelinin terekesinden varislerine ödenmesi Mahmiye-i Kostantıniyye mahallâtından ( ) mahallesinde sâkine olan bâ‘isü’l-kitâb Âişe bt. Mustafa nâm hatun Dîvân-ı Âlî -dâme mahfûfen bi’l-me‘âlî-’de mahmiye-i mezbûrede Çakır Ağa mahallesinde müteveffât olan Mihrinaz bt. Abdullah nâm hatunun mu‘tekāsı Safiye hatun nâm müteveffâtın li-ebeveyn karındaşı Ahmed Çelebi nâm mütevvefânın sulbî oğlu ve merkūme Mihrinaz’ın usûbet-i nesebiye tarîkiyle vârisi olup müteveffât-ı mezkûrenin terekesine vâzı‘u’l-yed olan fahrü’l-emâcid ve’l-a‘yân Lalezarzâde Mehmed Çelebi tarafından vech-i âtî üzere husûsa vekîl olup vekâleti nehc-i şer‘î üzere alâ vechi’l-hasm sâbit olan Mustafa Bey b. Mehmed nâm kimesneyi mahfil-i kazâya ihzâr ve üzerine takrîr-i da‘vâ edip bundan akdem vâlidem işbu hâzıra fi’l-meclis Fâtıma bt. Hasan nâm hatun babamdan irs-i şer‘î ile bana intikāl eden emvâlimden sekiz bin akçe kıymetli bir çift sürmâî altınlı çatma döşeğimi ve üç bin akçe kıymetli sarı kemhâ zenâne kaftânımı ve on iki ayaklı sekiz miskāl incimi dört bin akçe kıymetli altı miskāl altın saçbağımı ve sekiz bin akçe kıymetli yirmi bir buçuk miskāl tahta? altın bileziğimi ve bin akçe kıymetli yüz kırk dirhem ibrişim tülbend kuşağımı ve dört yüz akçe kıymetli üç münakkaş makrememi ve bin akçe kıymetli Mısır alacası zenâne kaftânımı ve bin akçe kıymetli mâ’î ile miskî alacası inâyet kaftânımı cem‘an yirmi altı bin dört yüz akçelik esvâbımı benim izin ve ma‘rifetim ile hıfz için merkūme Mihrinaz’a ibdâ‘ ve teslîm edip ol dahi cümlesini istibdâ‘ ve kabz edip hıfzında iken eşyâ-yı merkūmeyi isti‘mâl için âhara i‘âde ve teslîm etmekle ta‘addî ve istihlâk edip kıymetleri olan meblağ-ı mezbûr yirmi altı bin dört yüz akçe zimmetinde deyn olup ve nehc-i meşrûh üzere eşyâ-yı mezkûre hıfzında iken isti‘mâl için âhara i‘âde ve teslîm etmekle ta‘addî ve istihlâk edip kıymetleri olan meblağ-ı mezbûr zimmetinde deyn olduğuna hâl-i sıhhatinde mahzar-ı müslimînde i‘tirâf dahi etmişdir, kıymetleri olan meblağ-ı mezbûru müteveffât-ı mezkûrenin terekesinden taleb ederim dedikde gıbbe’s-suâl ve’l-inkâr ve akībe’l-istişhâd ve udûl-ı müslimînden el-Hâc Abdülcelil b. Mehmed el-İmâm ve Hüseyin b. Mehmed nâm kimesneler li-ecli’ş-şehâde hâzırân olup fi’l-vâkı‘ mesfûre Mihrinaz hâl-i sıhhatinde müdde‘iye-i mezbûrenin ber-vech-i meşrûh yirmi altı bin dört yüz akçelik esvâbı benim hıfz [u] zabtımda iken isti‘mâl için cümlesini âhara i‘âde ve teslîm edip ta‘addî ve istihlâk eyledim, kıymetleri olan meblağ-ı mezbûrun edâsı üzerime şer‘ân lâzım olup deynim olmuşdur deyü bizim huzûrumuzda bi’t-tav‘i’s-sâf ikrâr u i‘tirâf etti, bu husûsa şâhidleriz, şehâdet dahi ederiz deyü edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olup mûcebiyle meblağ-ı mezbûr terekesinden edâ olunmağa tenbîh olundu. Tahrîren fî-evâili Saferi’l-muzaffer li-sene erba‘a ve selâsîn ve elf. Şuhûdu’l-hâl: Himmet Ağa b. Receb el-Bevvâb, Mehmed Ağa b. ( ) el-Bevvâb, Mustafa Beşe.