Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 352 Hüküm no: 368 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri kâtibi Malkoç Efendi b. Ali’nin kefaletiyle Ahmed Bey’e borç verdiğini iddia eden Nesimi Efendi arasındaki davanın görüldüğü Sâbıkā yeniçeri kâtibi olan fahrü’l-emâcid ve’l-a‘yân Nesimi Efendi b. ( ) mahfil-i şer‘-i hatîrde hâlâ yeniçeri kâtibi olan zahrü’l-emâsil ve’l-akrân Malkoç Efendi b. Ali mahzarında üzerine da‘vâ edip bundan akdem biz ikimiz ve Ahmed Bey nâm kimesne meclisde hâzır iken merkūm Malkoç Efendi mezbûr Ahmed Bey’e üç bin guruş ikrâz eyle ben meblağ-ı merkūma kefîl ve zâmin oldum deyü bana emr edip ben dahi merkūmun emriyle mezkûr Ahmed Bey’e mâlımdan üç bin guruş ikrâz ve teslîm eyledim, ol dahi kabz eyledi idi, meblağ-ı mersûmu kefâleti hasebiyle merkūm Malkoç Efendi’den taleb ederin dedikde gıbbe’s-suâl mezbûr Malkoç Efendi cevabında fi’l-vâkı‘ mukaddemâ ben vech-i meşrûh üzere mezkûr Ahmed Bey’e üç bin guruş ikrâz eyle ben zâminim dedim, lâkin vech-i mezbûr üzere ikrâz ve teslîm eylediğini bilmem deyücek, merkūm Nesimi Efendi’den beyyine taleb olunup sûret-i hâl gıbbe’t-taleb ve’s-suâl ketb ve tahrîr olundu. Hurrire fî-evâsıtı şehri Recebi’l-mürecceb min-şühûr sene selâse ve selâsîn ve elf. Şuhûdu’l-hâl: Emîrü’l-ümerâi’l-kirâm Abdülkerim Paşa b. Hasan, Abdüsselâm Çavuş b. Ali, Müstedam Bey b. Abdullah er-râcil, Mehmed Beşe b. er-râcil, Ömer Efendi b. Musa el-müdderris, İbrahim Beşe b. ( ) er-râcil, Salih Çelebi b. ( ), Yusuf Bey b. ( ) er-râcil ve gayruhüm.