Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 360 Hüküm no: 372 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve civarında halkın elinde yeterli miktarda Osmanî akçesi bulunmadığından eski sikkelerin toplanıp yenisinin çıkarılması kararı Hâlâ makarr-ı saltanat-ı aliyye olan Kostantıniyye ve etrâf ve cevânibinde Osmanî râyic olmamağla halkın emr-i ma‘âşında fart-ı müzâyaka ve es‘ârda kemâl mertebe galâ olmağla savb-ı saltanat-ı aliyyeden sikke-i cedîde ihrâc olunmak emrinde müşâvere olunmak fermân olunmağın şeyhülislâm ve vüzerâ-i izâm ve kādıaskerler ve İstanbul kādısı ve sâir erkân-ı devlet bi’l-fi‘il kāimmakām-ı sadr-ı a‘zam olan izzetlü Mehmed Paşa hazretlerinin sarâyına hâzırûn olup husûs-ı mezbûr için akd-i meclis olundukta ba‘de’l-müşâvere cümlenin reʼyleri sikke-i cedîde ile meskûk hâlisü’l-ayâr akçe ihrâc olunup Osmanî üçer akçeye râyic olup eski sikke ile meskûk olan akçenin sahîhü’l-ayârı Darbhâne’ye verilip sikke-i cedîde madrûb oldukdan sonra râyic olan ve Mısır parası üçer akçeye râyic olup altın yüz yirmi ve guruş-ı kebîr seksen ve guruş-ı esedî yetmiş akçeye râyic olmak üzere karar verildikte mâ vaka‘a hıfzen li’l-makāl zabt olundu. Hurrire fi’l-yevmi’l-hâmis min-Saferi’l-muzzaffer li-sene erba‘a ve selâsîn ve elf. Şuhûdu’l-hâl: Çavuşbaşı Ali Ağa b. Abdülmennân, Mustafa Çavuş b. Receb, Ahmed Bey b. Ali el-bevvâb, İbrahim Bey b. ( ) el-bevvâb ve gayruhüm.