Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 43 Hüküm no: 3 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi b. Ömer’in Şatır Bâli Bey b. Mustafa’nın mülkleriyle alakasının olmadığı Vilâyet-i Rumeli’nde medîne-i Saray sükkânından işbu hâmilü’l-kitâb fahrü’l-akrân Şâtır Bâli Bey b. Mustafa meclis-i şer‘-i hatîr-i lâzımü’t-tevkīrde, âti’z-zikr olan çiftlik ve değirmen ve tarlalara vâzı‘u’l-yed idiği şer‘an sâbit olan medîne-i merkūme ahâlîsinden İbrahim Efendi b. Ömer nâm vâ‘iz mahzarında üzerine takrîr-i da‘vâ edip, medîne-i merkūme nevâhîsinden Visoka nâhiyesinde Kerşon nâm karye kurbunda vâki‘ beynimizde ve lede’l-ahâlî ma‘lûmü’l-hudûd olup bir beyt-i süflîyi ve iki sığır damı ve zât-ı eşcâr-ı müsmire ve gayr-ı müsmire hadîkayı müştemil olup Vranyak çiftliği demekle ma‘rûf olan mülk çiftliğine ve zikr olunan çiftliğin kurbunda cârî olup Vranyak nâm nehir üzerinde dâyir bir göz değirmen ve karye-i mezbûre sınırı dâhilinde mevâzi‘-i şettâda vâki‘ olup her birinin hudûdu beynimizde ve lede’l-ahâlî ma‘lûm olmağın, tehdîd ve tavsîfden müstağnî hâlâ hakk-ı tasarrufu taht-ı yedinde olan kırk dönüm tarlalarıma mezbûr İbrahim Efendi bi gayri vech vaz‘-ı yed eder, suâl olunup kasr-ı yedine tenbîh olunmak matlûbumdur dedikde, gıbbe’s-suâl mezbûr İbrahim Efendi cevâbında, benim zikr olunan çiftlik değirmeni ve tarlalarda min ba‘d alâkam ve medhalim yokdur, cümlesi mezkûr Şâtır Bâli Bey’indir dedikde, mezbûr İbrahim Efendi’nin minvâl-i meşrûh üzre cârî olan kelimâtı mezkûr Şâtır Bâli Bey talebi ile ketb ve yedine def‘ olundu. Tahrîren fî gurreti Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Yusuf Ağa b. ( ) reisü’l-muhzırîn, Ali Çavuş b. Abdullah, Mehmed Çelebi b. İbrahim, Alişah b. Gazanfer, Derviş b. ( ) ve gayruhüm.