Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 44 Hüküm no: 4 Orijinal metin no: [2a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çavuş b. Osman’ın Ali Beşe b. Abdullah’a borcu olmadığı Vilâyet-i Rumeli’nde Misivri kazâsına tâbi‘ Bâli Gözeki? nâm karye ahâlîsinden Ali Beşe b. Abdullah nâm râcil meclis-i şer‘-i lâzımü’t-tevkīrde, dergâh-ı âlî -dâme mahfûfen bi’l-me‘âlî- yeniçerileri çavuşlarından olup, elli sekizinci ağa bölüğünden fahrü’l-akrân Mustafa Çavuş b. Osman mahzarında üzerine takrîr-i da‘vâ edip, târih-i kitâb senesi Şa‘bânü’l-mu‘azzamının evâilinde mezbûr Mustafa Çavuş Âsitâne-i sa‘âdet’den gelip senin ba‘zı şâkîlerin vardır deyü beni haps ve kasaba-i merkūme sâkinlerinden Mehmed Çelebi nâm kimesne yediyle benden cerîme nâmına bi gayri vech-i şer‘î on bin nakd-i râyic fi’l-vakt akçemi kabz eyledi. Suâl olunup alıverilmek matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan sıdk-ı da‘vâsına beyyine taleb olundukda, ityân-ı beyyineden izhâr-ı acz edip istihlâf etmeğin, mezbûr Mustafa Çavuş’a minvâl-i meşrûh üzre merkūm Ali Beşe’nin cerîmesi nâmına mezkûr Mehmed Çelebi yedinden on bin mezbûru’n-na‘t akçe alıp kabz etmediğine kendiye yemîn teklîf olundukda, ol dahi hasbe’l-mes’ûl yemîn billâhi te‘âlâ etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Mustafa Beşe b. Mehmed mumcu, Mustafa b. Abdullah odabaşı, Bâli Beşe b. Abdullah er-Râcil, Mehmed Beşe ve gayruhüm.