Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 46 Hüküm no: 8 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim Efendi b. İbrahim’den miras odanın Fâtıma Hatun b. Mehmed’e satıldığı Mahmiye-i İstanbul’da Mehmed Paşa zâviyesinin şeyhi iken bundan esbak vefât eden merhûm Abdülkerim Efendi b. İbrahim’in verâseti, zevce-i metrûkeleri Hümâ bt. Ahmed ve Aişe bt. Mustafa’ya ve sulbî kebîr oğulları Pîr Mehmed Çelebi’ye ve Abdülkerim Çelebi’ye ve sulbiye kebîre kızları Râbia ve Emetullah nâm hâtunlara ve sulbiye sagīre kızı Sâbiha’ya münhasıra olup, mezbûr Pîr Mehmed Çelebi sagīre-i mersûmenin tesviye-i umûru için cânib-i şer‘-i mutahhardan mansûb vasîsi olduğu hâkim-i muvakki‘ü’l-kitâb huzûrlarında sâbit ve mütehakkık oldukdan sonra mezbûr Pîr Mehmed Çelebi kendisi tarafından asâleten ve sagīre-i mersûme tarafından vesâyeten ve vâlidesi merkūme Aişe Hâtun ile hemşîresi Rukiye Emine Hâtun taraflarından zikr-i âtî ebniyeyi bey‘a vekîl olup, mezbûretân ma‘rifet-i şer‘iyye ile ârifân olan Ömer Efendi b. Mustafa ve Eyüb Çelebi b. Durak şehâdetleriyle hasm-ı câhid mahzarında vekâleti sâbite oldukdan sonra vekâleten ve merkūm Abdülkerim Çelebi dahi kezâlik kendi tarafından asâleten ve vâlidesi mezbûre Hümâ ile hemşîresi mesfûre Râbia Hâtun taraflarından kezâlik zikri âtî olan ebniyeyi bey‘a vekîl olup, şâhidân-ı mezbûrân şehâdetleriyle hasm-ı câhid mahzarında şer‘an vekâleti sâbite oldukdan sonra vekâleten mahfil-i kazâda, işbu sâhibetü’l-kitâb fahrü’l-muhadderât Fâtıma Hâtun bt. Mehmed tarafından ikrâr-ı âti’z-zikri tasdîka vekîl olup, vekâleti nehc-i mu‘teber üzre sâbite olan sadrî kebîr oğlu Mehmed b. Ahmed mahzarında her biri asâleten ve vekâleten ve vesâyeten ikrâr ve takrîr-i kelâm edip, mûrisimiz müteveffâ-yı mersûm hâl-i hayâtında ve kemâl-i sıhhatinde mahmiye-i mersûmede Helvacıbaşı mahallesinde vâki‘ senede merkūm Behrâm Paşa Evkāfı’na yedi yüz yirmi akçe mukāta‘a ile tasarrufunda olan arsa-i hâliye üzerine binâsı mülkü olmak üzre izn-i mütevellî ile beş bâb müte’ehhilîn odaları binâ edip, ba‘de vefâtihî bi hasebi’l-irsi’ş-şer‘î bize intikāl eylemiş idi. Lâkin babamız müteveffât-ı mersûmenin düyûn-ı müsbetesi olup zarûret-i deyni için sâlifü’z-zikr beş bâb odalardan iki tarafı bizim mülk-i mûrisimiz olan odalara ve bir tarafı tarîk-i âm ve bir tarafı tarîk-i hâs ile mahdûd bir bâb fevkānî ve bir bâb tahtânî odaları ve sofayı ve kenîfi müştemil arsasına senede vakf-ı mezbûra yüz altmış akçe mukāta‘alı olup, binâsı mülkümüz olan bir bâb müte’ehhilîn odasını müvekkile-i mezbûre Fâtıma Hâtun’a tarafeynden îcâb ve kabûlü hâvî bey‘-i bât-ı sahîh-i şer‘î ile otuz iki bin beş yüz fıddî râyic fi’l-vakt akçeye bey‘ ve teslîm edip, ol dahi iştirâ ve tesellüm eyledikden sonra semeni olan meblağ-ı sâlifü’l-beyân otuz iki bin beş yüz mezbûru’n-na‘t akçeyi mersûme Fâtıma Hâtun yedinden bi’t-tamâm ahz ve kabz edip, ba‘de’l-yevm mârrü’z-zikr odanın binâsı mersûme Fâtıma Hâtun’un mülk-i müşterâsıdır, keyfe mâ-teşâ ve tahtâr mutasarrıfe olsun dedikde, mukırrân-ı mersûmânın asâleten ve vekâleten ve vesâyeten cârî olan ikrârını merkūm Mehmed bi’l-vekâle vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Fi’l-yevmi’l-ışrîn min Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: Mustafa Efendi b. Mehmed el-Hatîb, Mehmed Efendi b. Memi el-Müderris, Ahmed Efendi b. Vildan el-Müderris, el-Hâc İsmail b. ( ) el-İmâm, Mehmed [b.?] Hüdâverdi el-Müezzin, İshak b. Muharrem, Eyüb b. Durak, Hüseyin b. Yakub, el-Hâc Mustafa b. Abdullah, Dilaver b. Abdullah, Abdülkādir b. Mustafa ve gayruhüm.