Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 46 Hüküm no: 7 Orijinal metin no: [2b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köle Handan b. Abdullah’ı öldüren köle Dilaver b. Abdullah’ın, maktûlün sahiplerine teslim edildiği Vilâyet-i Rumeli’de Çorlu kasabasında bundan akdem maktûlen müteveffâ olan Handan b. Abdullah nâm mu‘takın verâseti mevlâ-yı mu‘takı olan Yahya’nın sulbî oğlu oğulları Hüseyin ve Yahya ibney Pîr Ali nâm sagīrler ile diğer sulbî oğlu oğlu Ebûbekir b. İbrahim nâm sagīre münhasıra olduğu zâhir ve müte‘ayyin oldukdan sonra sıgār-ı merkūmûnun li’l-ihtiyâc men lehü’n-nasb olan hâkim tarafından mansûb vasîleri olan Mustafa Bey b. İbrahim nâm râcil meclis-i şer‘-i kavîmde, işbu bâ‘isü’l-kitâb Mumcu Hüseyin Bey b. Hasan er-Râcil mahzarında bi’l-vesâye ikrâr ve takrîr-i kelâm edip, mezbûr Mumcu Hüseyin Bey’in abd-i memlûkü olup işbu hâzır bi’l-meclis olan uzun boylu, açık kaşlı, kara gözlü Çerkeziyyü’l-asl Dilaver b. Abdullah nâm şâbb-ı emred gulâm bundan akdem müteveffâ-yı mezbûr Handan’ı târih-i kitâb şehrinin dördüncü vâki‘ olan sebt günü gecesi kasaba-i merkūmede yattığı yerde amden balta ile başına vurup katl eylediğini, mevlâsı mezbûr Mumcu Hüseyin Bey muvâcehesinde bi tav‘ihî ikrâr ve i‘tirâf edip, mevlâsı dahi mezbûrun i‘tirâfını bi’l-muvâcehe tasdîk etmekle, bu sûretde mevlâsı gulâm-ı kātili evliyâ-i katîle def‘ ile diyyet-i [5a] maktûlü fedâ beyninde muhayyer olduğu cihetden gulâm-ı mezbûru bana def‘ ve teslîm etmeğin, ben dahi bi’l-vesâye mezbûr Mumcu Hüseyin Bey’in yedinden alıp sıgār-ı merkūmîn için tesellüm eyledim dedikde, mukırr-ı merkūm İbrahim Bey’in bi’l-vesâye sudûr eden i‘tirâfını mezbûr Mumcu Hüseyin Bey’in dahi bi’l-muvâcehe tasdîk ve gulâm-ı mevsûf-ı merkūmu vech-i muharrer üzre teslîm eylediğini tahkīk edicek, mâ hüve vaka‘a bi’t-taleb ketb olundu. Tahrîren fi’l-yevmi’l-hâdî aşer min Zilhicceti’l-harâm min şuhûri li sene isneteyn ve erba‘în ve elf. Şuhûdü’l-hâl: Abdi Bey b. Abdurrahman, Mehmed Beşe b. Sinan odabaşı, Mumcu Mehmed Beşe b. Abdullah el-Mübâşir, Yahya Bey b. Zekeriya, Hüseyin b. Ahmed ve gayruhüm.