Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 48 Hüküm no: 10 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köle Ali b. Abdullah’ı öldüren köle Dilaver b. Abdullah’ın maktûlün vârislerine teslim edildiği Vilâyet-i Rumeli’nde Çorlu kasabasında Câmi‘-i Atîk mahallesinde bundan akdem maktûlen müteveffâ olan Ali b. Abdullah’ın mevlâ-yı mu‘takı olan Yahya’nın sulbî oğlu oğulları ve bi tarîki’l-velâ vârisleri olan Yahya ve Hüseyin ibney Pîr Ali nâm sagīrler ile diğer oğlu oğlu ve kezâlik vârisi Ebûbekir b. İbrahim nâm sagīrin li’l-ihtiyâc men-lehü’n-nasb olan hâkimü’ş-şer‘ tarafından mansûb vasîleri olan Mustafa Bey b. İdris nâm râcil meclis-i şer‘e Dilaver b. Abdullah nâm emred gulâmı ihzâr ve mevlâsı olan Mumcu Hüseyin Bey b. Hasan nâm râcil mahzarında bi’l-vesâye takrîr-i da‘vâ edip, mezbûr Dilaver târih-i kitâb senesi şehrinin dördüncü vâki‘ olan sebt günü gecesi sâlifü’z-zikr Ali’yi yattığı yerde amden balta ile başına vurup katl eyledikde verâseti vech-i meşrûh üzre sıgār-ı merkūmeteyne münhasıra olmağın, mezbûr Dilaver’i ihzâr eyledim, vesâyet-i mahkiyyem hasebiyle vâki‘ hâl mezbûrdan suâl olunup mûceb-i şer‘iyyesi icrâ olunmak taleb ederim dedikde, gıbbe’s-suâl mezkûr Dilaver cevâbında, fi’l-vâki‘ merkūm Ali sâbıkan bana birkaç def‘a fi‘l-i şenî‘ kasd edip ben dahi tahammül edememek ile mezbûr Ali’yi leyle-i merkūmede yattığı yerde başına amden bir balta ile vurup katl eyledim idi deyü bi’t-tav‘i’s-sâf ikrâr ve i‘tirâf edip, mevlâsı mezbûr Mumcu Hüseyin Bey dahi fi’l-hakīka hâl bu minvâl üzre olmuşdur deyü mezbûr Dilaver’in i‘tirâfını bi’l-muvâcehe tasdîk edip, gulâm-ı merkūmu evliyâ-yı katîle teslîm eylediğini tahkīk edicek, gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis aşer min Zilhicceti’ş-şerîfe min şuhûri li sene isneteyn ve erba‘în ve elf. Şuhûdü’l-hâl: Abdi Bey b. Abdurrahman, Yahya Bey b. Zekeriya, Mehmed Beşe b. Şaban Reisü’l-muhzırîn?, Mumcu Mehmed Beşe b. Abdullah el-Mübâşir, Hüseyin b. Ahmed el-muhzır ve gayruhüm.