Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 72 Hüküm no: 38 Orijinal metin no: [9a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bahri Efendi b. Ali Efendi’nin Osman Beşe’de ödünçten alacağı olduğu Udûlden Hüseyin Efendi b. İsâ ve Şaban Beşe b. Ahmed nâm kimesneler meclis-i şer‘-i şerîfde hâzırân olup, hâl-i hayâtında Dâru’l-hilâfeti’l-aliyye mahmiye-i Kostantıniyye mahallâtından ( ) mahallesinde sâkin iken bundan akdem deryâda garîken fevt olan Osman Beşe nâm kimesnenin Bayram nâm sagīr oğluna hâkim-i men lehû velâyetü’n-nasb tarafından mansûb vasî olan ve vesâyeti hasebiyle husûs-ı âtiyyü’z-zikri inkâr eden Ali Beşe b. Behrâm nâm kimesne mahzarında, bâ‘isü’l-kitâb Mehmed Bahri Efendi b. merhûm Ali Efendi el-Müderris kıbelinden vech-i meşrûh-i âtiyyü’z-zikr üzre isbât ve ityân-ı beyyineye vekâleti Abdülaziz b. Süleyman ve Mehmed b. Himmet nâm şâhidlerin şehâdetleri ile sâbit olan Osman Efendi b. Yakub nâm kimesneden bi’l-vekâle sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, mûmâ ileyh müvekkil Mehmed Bahri Efendi’nin, müteveffâ-i mezbûrun zimmetinde yüz kuruşu karz-ı şer‘î cihetinden ve on kuruşu nev‘i ve vasfı beynlerinde ma‘lûm olan müşterâ-yı makbûz çuka bahâsından olmak üzre lâzımü’l-edâ ve vâcibü’l-kazâ yüz on kuruş hakkı vardır. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcibince muhallefât-ı müteveffâdan edâsına hükmedildi. Cerâ zâlike ve hurrire fi’l-yevmi’l-hâdî ve’l-ışrîn min Zilhicce eş-şerîfe min şuhûri sene isneteyn ve erba‘în ve elf. Şuhûdü’l-hâl: Mehmed Efendi b. Mehmed el-kadı, Yahya b. Zekeriya, Dilaver Çavuş b. Abdullah, Mansur b. Abdullah