Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 75 Hüküm no: 41 Orijinal metin no: [10a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Bey b. Lütfullah’ın evini bey‘ bi’l-istiğlâl ile sattığı Dâru’l-hilâfeti’l-aliyye mahmiye-i Kostantıniyye mahallâtından Şeyh Ferhad mahallesinde sâkin olan Derviş Bey b. Lütfullah nâm kimesne meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzır olup, mahalle-i mezbûrede vâki‘, bir tarafdan Mehmed b. Mustafa mülkü, diğer tarafdan Mahbûbe Hâtun bt. Lütfullah mülkü, öteki tarafdan Osman Çavuş b. Mehmed mülkü ve diğer tarafdan da tarîk-i âm ile mahdûd bulunan cemî‘-i menzilini cümle tevâbi‘ ve levâhıkı ve kâffe-i menâfi‘ ve mürâfıkı ile râyicü’l-vakt sekiz yüz pâre sikke-i harbiyye-i fıddiyye riyâl semen-i mu‘ayyen-i makbûzla, bundan akdem Sadullah Çavuş nâm babaları vefât eden Mehmed ve Mehmed Ali nâm sagīreyn kardeşlere, tesviye-i umûrları için hâkim-i men lehû velâyetü’n-nasb kıbelinden mansûb vasî olan hâmil-i hâze’l-kitâb umdetü kuzâti’l-İslâm zübdetü vülâti’l-enâm El-Hâc Abdurrahman b. Ahmed’e îcâb kabûlü ve teslîm tesellümü hâvî bey‘ ile bey‘ ettiğini ikrâr ve i‘tirâf etti. Vasîyy-i mezbûr da sagīreyn-i mezkûreynin mâlıyla ve istiğlâl maksadıyla menzil-i mezbûru ondan iştirâ etti. Bâyi‘-i mezkûrun menzil-i merkūmu icâreye almak istemesi üzerine vekîl-i mesfûr, ba‘de’t-tahliye ve’t-tekābuz zeyilde mezkûr târihden bir sene tamâmına yüz riyâl ücret-i kirâ ile icâreye verdi. Cerâ zâlike ve hurrire fi’l-yevmi’l-ışrîn min Zilhicce eş-şerîfe sene isneteyn ve erba‘în ve elf. Şuhûdü’l-hâl: Fahrü’l-kuzât Abdullah Efendi b. Ahmed Efendi, Seyyid Mahmud Efendi b. Seyyid Sinan Efendi, Hidayetullah Efendi b. Mehmed Efendi, Hâce Mustafa b. el-Hâc Hasan, Mehmed b. Habib, Abdullah Çelebi b. Yusuf, Hüseyin b. Sinan, el-Hâc Ali b. Veli, el-Hâc Ramazan b. Hacı Bâli, Ahmed Çavuş b. Sefer Çavuş, İbrahim b. Ramazan