Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 74 Hüküm no: 40 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim Efendi b. İbrahim’den miras odanın Mehmed Kethüdâ b. Yahya’ya satıldığı Mahmiye-i Kostantıniyye’de Mehmed Paşa zâviyesinin şeyhi iken bundan esbak vefât eden merhûm Abdülkerim Efendi b. İbrahim’in verâseti, zevce-i metrûkeleri Hümâ bt. Ahmed’e ve Aişe bt. Mustafa nâm hâtuna ve sulbî kebîr oğulları Pîr Mehmed Çelebi ve Abdülkerim Çelebi’ye ve sulbiye kızları Râbia ve Emetullah nâm hâtunlara ve sulbiye sagīre kızı Sâbiha’ya münhasır olup mezbûr Pîr Mehmed Çelebi sagīre-i mersûmenin tesviye-i umûru için men lehü’n-nasb olan hâkim tarafından mansûb vasîsi olduğu hâkim-i muvakki‘-i kitâb huzûrunda sâbit ve mütehakkık oldukdan sonra mezbûr Pîr Mehmed Çelebi kendi tarafından asâleten ve sagīre-i mersûme tarafından vesâyeten ve vâlidesi merkūme Aişe Hâtun ile hemşîresi Emetullah Hâtun taraflarından zikri âtî olan ebniyeyi bey‘a vekîl olup, mezbûretânı ma‘rifet-i şer‘iyye ile ârifân olan Ömer Efendi b. Mustafa ve Eyüb Çelebi b. Durak şehâdetleri ile hasm-ı câhid mahzarında vekâleti sâbite oldukdan sonra vekâleten Abdülkerim Çelebi dahi kezâlik kendi tarafından asâleten ve vâlidesi mezbûre Hümâ ile hemşîresi mesfûre Râbia Hâtun taraflarından kezâlik zikr-i âtî olan ebniyeyi bey‘a vekîl olup, şâhidân-ı mezbûrân şehâdetleri ile hasm-ı câhid mahzarında şer‘an vekâleti sâbite oldukdan sonra vekâleten mahfil-i kazâda, işbu hâfızu’l-kitâb Fahrü’l-akrân Mehmed Kethüdâ b. Yahya mahzarında her biri asâleten ve vekâleten ve vesâyeten ikrâr ve takrîr-i kelâm edip, mûrisimiz müteveffâ-yı mersûm hâl-i hayâtında ve kemâl-i sıhhatinde mahmiye-i mezbûrede Helvacıbaşı mahallesinde vâki‘ senede merkūm Behrâm Paşa evkāfına yedi yüz yirmi akçe mukāta‘a ile tasarrufunda olan arsa-i hâliye üzerine binâsı mülkü olmak üzre izn-i mütevellî ile beş bâb müte’ehhilîn odaları binâ edip, ba‘de vefâtihî bi hasebi’l-irsi’ş-şer‘î bize intikāl eylemişdi. Lâkin babamız müteveffâ-yı mersûmun düyûn-ı müsbetesi olup, zarûret-i deyni için sâlifü’z-zikr beş bâb odalardan bir tarafı Saraylı? Hâtun Vakfı ve bir tarafı Zeliha bt. Abdullah nâm hâtun mülkü ve bir tarafı masraf kâtibi Ali Efendi b. ( ) mülkü ve bir tarafı tarîk-i hâs ile mahdûd fevkānî ve tahtânî odaları ve sofayı ve kenîfi ve muhavvatayı müştemil arsasının senede vakf-ı mezbûra yüz yetmiş beş akçe mukāta‘ası olan binâsı mülk bir bâb odayı mezbûr Mehmed Kethüdâ’ya tarafeynden îcâb ve kabûlü hâvî bey‘-i bât-ı sahîh-i şer‘î ile otuz üç bin nakd-i râyic fi’l-vakt akçeye bey‘ ve teslîm edip, ol dahi iştirâ ve tesellüm eyledikden sonra semeni olan meblağ-ı mezbûr yirmi otuz üç bin akçeyi merkūm Mehmed Kethüdâ yedinden bi’t-tamâm ve’l-kemâl ahz u kabz edip, ba‘de’l-yevm mârrü’z-zikr odanın binâsı mersûm Mehmed Kethüdâ’nın mülk-i müşterâsıdır, keyfe mâ yeşâ ve yahtâr mutasarrıf olsun dediklerinde, mukırrân-ı merkūmânın asâleten ve vekâleten ve vesâyeten cârî olan ikrârların merkūm Mehmed Kethüdâ vicâhen tasdîk ve şifâhen tahkīk eylediklerinde, mâ hüve’l-vâki‘ bi’t-taleb ketb olundu. Tahrîren fi’l-hâdî ve’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: eş-Şeyh Ömer Efendi b. Mustafa, Mustafa Efendi b. Mehmed el-Hatîb, Mehmed Efendi b. Mehmed el-Müderris, Ahmed Efendi b. Vildan el-Müderris, Sinan b. Mustafa, Eyüb b. Durak, Cafer b. Ali, Ali b. Hüseyin, Ebûbekir b. Kaya, Hüseyin b. Yahya, es-Seyyid Mustafa b. es-Seyyid Ahmed, Ali b. Mehmed [Ahmed].