Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 93 Hüküm no: 62 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Kurd’un cariye davasının reddi Mahmiye-i İstanbul’da Ahırkapısı mahallesinde sâkine Sitti Hâtun bt. ( ) meclis-i şer‘-i şerîfde, işbu hâmiletü’l-kitâb Fâtıma bt. Kurd nâm hâtun mahzarında üzerine takrîr-i da‘vâ edip, bundan akdem mezkûr Fâtıma Hâtun uzun boylu açık kaşlı Şâkire bt. Abdullah nâm Gürciyyetü’l-asl on bin akçe kıymetli mülk câriyeme bi gayri vech-i şer‘î vaz‘-ı yed eylemiş idi. Hâlâ câriye-i mezbûre mevcûde ise aynını hâlike ise kıymet-i meşrûhasını mezbûre Fâtıma Hâtun’dan taleb ederim dedikde, gıbbe’s-suâl mezbûre Fâtıma Hâtun cevâbında, câriye-i mezkûre mukaddemâ zevcem olup vefât eden mezbûre Sitti Hâtun’un sadrî oğlu İbrahim Subaşı’nın mülkü olup, ba‘de vefâtihî verâseti mezbûre Sitti Hâtun’a ve bana münhasıra oldukda câriye-i mezkûre hîn-i kısmet-i terekede benim rub‘ hisse-i şer‘iyyem mukābelesinde bana isâbet edip, hattâ hîn-i kısmet-i terekede mezbûre Sitti Hâtun hâzıra ve sâkine olmuşdur deyü def‘le mukābele edicek, gıbbe’l-istintâk mezbûre Sitti Hâtun cevâbında, fi’l-hakīka hîn-i kısmetde câriye-i mevsûfe-i mezkûreyi mezbûre Fâtıma Hâtun rub‘ hisse-i şer‘iyyesi mukābelesinde ahz eyledikde, mezbûre Sitti Hâtun hâzıra ve sâkine olduğunu bi tav‘ihâ mu‘terife olmağın, bi gayri vech mezbûr Fâtıma Hâtun’a mu‘ârazadan men‘ olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî mine’l-Muharremi’l-harâm li sene selâse ve erba‘în ve elf. Şuhûdü’l-hâl: El-Hâc Ahmed b. ( ), İskender Bey b. Şaban, Hızır b. Abdullah, Yunus b. ( ).