Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 92 Hüküm no: 61 Orijinal metin no: [13b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey b. Mehmed’in damadı Mehmed Subaşı b. Abdullah’dan alacaklı olduğu ve mühlet verildiği Dergâh-ı âlî -dâme mahfûfen bi’l-me‘âlî- bevvâblarından işbu bâ‘isü’l-kitâb fahrü’l-emâsil ve’l-akrân Mahmud Bey b. Mehmed nâm kimesne meclis-i şer‘-i hatîr-i lâzımü’t-tevkīrde, kendinin damadı olup yeniçeri çorbacılarından olan Mehmed Subaşı b. Abdullah nâm mahzarında takrîr-i da‘vâ edip, bundan akdem damadım mezbûr Mehmed Subaşı zimmetinde bi tarîki’l-karzi’ş-şer‘î dört yüz guruş-ı kebîr hakkım olup edâdan imtinâ‘ etmeğin alıverilmek taleb ederim dedikde, gıbbe’s-suâl mezbûr Mehmed Subaşı cevâbında, fi’l-vâki‘ kayın atam müdde‘î-i merkūma Mahmud Bey’e bi tarîki’l-karz dört yüz guruş-ı kebîr deynim var idi. Lâkin üç yüz altmış guruşunu mukaddemâ kendiye edâ ve teslîm edip zimmetimde ancak kırk guruş kalmışdır dedikde, gıbbe’l-istintâk merkūm Mahmud Bey husûs-ı mezbûru bi’l-külliye inkâr edip, mesfûr Mehmed Subaşı’dan zikri sebk eden üç yüz altmış guruşu edâ ve teslîm eylediğine beyyine taleb olundukda, isbât-ı beyyine için istimhâl edicek mehil-i şer‘î ile imhâl olunup ve zimmetinde elân deyni olduğuna i‘tirâf eylediği kırk guruşun edâsına tenbîh olunmakla, sûret-i hâl gıbbe’t-taleb ve’s-suâl ketb ve tâlibi yedine def‘ olundu. Tahrîren fi’l-yevmi’r-râbi‘ min şehri’l-Muharremi’l-harâm li sene selâsin ve erba‘în ve elf. Şuhûdü’l-hâl: Mehmed Efendi b. Mehmed, Yusuf Bey b. Abdullah, Mustafa Bey b. Mehmed el-Mübâşir, Dilaver Çavuş b. Abdullah.