Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 94 Hüküm no: 64 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melik v. Serkis’in Ali Bey b. Mustafa’ya borçlu olduğu İşbu hâmilü’l-kitâb Ali Bey b. Mustafa nâm cündî meclis-i şer‘-i hatîr-i lâzımü’t-tevkīrde, Ermeni tâifesinden Melik v. Serkis muvâcehesinde üzerine takrîr-i da‘vâ edip, mezbûr Melik zimmetinde cihet-i karz-ı şer‘îden yüz kıt‘a riyâlî guruş ve evsâfı beynimizde ilm-i şer‘î ile ma‘lûme mükemmel rahtı ile bir re’s at bahâsından dahi yüz kıt‘a riyâlî guruş ki cem‘an mezbûr Melik zimmetinde iki yüz riyâlî guruş hakkım olup, taleb eylediğimde vermeden ta‘allül eder suâl olunup alıverilmek matlûbumdur dedikde, gıbbe’s-suâl mezbûr Melik cevâbında, fi’l-hakīka müdde‘î-i mezbûr Ali Bey’e zimmetinde vech-i meşrûh üzerine iki yüz riyâlî guruş lâzımü’l-edâ ve vâcibü’l-kazâ deynim vardır deyü bi’t-tav‘i’s-sâf ikrâr ve i‘tirâf etmeğin, mezbûr Melik meblağ-ı mezbûr iki yüz kıt‘a riyâlî guruşun edâsıyla ilzâm olunup, mâ hüve’l-vâki‘ bi’t-taleb ketb olundu. Tahrîren fî evâhiri’l-Muharremi’l-harâm li sene selâsin ve erba‘în ve elf. Şuhûdü’l-hâl: Yusuf Bey b. Şaban, Haydar Bey b. ( ), Mehmed b. Ali, Hüseyin b. Hasan, Mehmed b. Ahmed.