Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 95 Hüküm no: 65 Orijinal metin no: [14a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti Hatun Vakfına ait iki odanın Abdullah Efendi b. Şeyh Abdurrahman Efendi’ye kiralandığı Dârü’s-saltanati’s-seniyye mahmiyye-i Kostantıniyye’de vâki‘ merhûme mağfûrun lehâ Sitti Hâtun Vakfı’nın bi’l-fi‘il mütevellîsi olan Osman Bey b. Mehmed nâm kimesne meclis-i şer‘-i hatîr-i lâzımü’t-tevkīrde, işbu hâfızu’l-kitâb umdetü’l-müderrisîni’l-kirâm Mevlânâ Abdullah Efendi b. el-merkūm eş-Şeyh Abdurrahman Efendi mahzarında bi tav‘ihî ikrâr ve takrîr-i kelâm edip, vakf-ı merkūmdan mahmiye-i mersûmede Muhtesib Karagöz mahallesinde vâki‘ bir tahtânî ve üç fevkānî hucurâtı ve bir tahta-pûş ve bi’r-i mâyı ve kenîfi müştemil olup, iki tarafı vakf-ı mezbûr ve bir tarafı tarîk-i hâs ve bir tarafı tarîk-i âm ile mahdûd olan bir bâb oda ile zikr olunan odaya muttasıl olup bir tahtânî hücreyi ve bir sofayı ve kenîfi ve eşcâr-ı müsmire ve gayr-ı müsmireyi hâviye muhavvatayı muhtevî olup, bir tarafı zikr olunan oda ve bir tarafı yine vakf-ı mezbûr ve bir tarafı tarîk-i hâs ve bir tarafı tarîk-i âm ile mahdûd olan oda taraf-ı vakfdan ücret-i mu‘accele ve icâre-i müeccele ile îcâr olunmak her vechile lâzım ve mühim olup kirâren ve mirâren nidâ ve müzâyede olundukda, zikirleri sebk eden iki bâb oda ecr-i misilleri olan yevmî üç akçe icâre-i müeccele ve elli bin akçe ücret-i mu‘accele ile müşârunileyh Abdullah Efendi üzerinde karâr edip, bir akçe ziyâde ile âhar tâlibi olmayıp minvâl-i muharrer üzre îcâr olunmak min külli’l-vücûh vakfa nâfi‘ olmağın, tevliyet-i mahkiyyem hasebiyle zikr olunan iki bâb odayı yevmî üç akçe icâre-i müeccele ile ve elli bin akçe ücret-i mu‘accele ile mûmâ-ileyh Abdullah Efendi’ye îcâr ve teslîm eylediğimde, müşârunileyh dahi vech-i meşrûh üzre istîcâr ve kabûl eyledikden sonra zikr olunan elli bin akçe ücret-i mu‘acceleyi bi’t-tamâm ve’l-kemâl yedinden alıp vakf için kabz u zabt edip, kendi mâlıyla binâ ve ihdâs eylediği ebniye kendinin mülkü olmak üzre ebniye ihdâsına izin ve yedine hat ve hâtemi müştemil temessük verdim. Min ba‘d zikr olunan elli bin akçe ücret-i mu‘acceleden müşârunileyh Abdullah Efendi zimmetinde bir akçe ve bir habbe kalmamışdır, keyfe mâ yeşâ ve yehtâr mutasarrıf olsun dedikde, mütevellî-i merkūm Osman Bey’i kelimât-ı meşrûhasında mûmâ-ileyh Abdullah Efendi dahi bi’l-muvâcehe tasdîk ve vech-i muharrer üzre istîcâr ve kabûl eylediğini tahkīk edicek, mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Kıdvetü’l-ulemâi’l-kirâm Abdülaziz Efendi neclü’l-müvellâ el-merhûm Hüsameddin Efendi, Fahrü’l-müderrisîni’l-kirâm Hamdi Efendi, Halil b. Timur, es-Seyyid Abdülgafur eş-şehîr bi Küçük Emîr, Kâtibü’l-hurûf Nakībzâde, Hasan Çavuş b. Mustafa, Hasan Bey b. Mustafa el-Cündî, Halil b. Mustafa, Mustafa Çavuş b. Murad, Receb Çavuş b. Abdullah.