Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 96 Hüküm no: 66 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müferrah bt. Abdullah’ın Fâtıma Hatun bt. Hasan Efendi’ye menzilini satıp tarlalarının tasarruf hakkını devrettiği Medîne-i Üsküdar mahallâtından Toygartepesi mahallesi sâkinelerinden Müferrah bt. Abdullah nâm hâtun meclis-i şer‘-i hatîr-i lâzımü’t-tevkīrde, Fâtıma Hâtun bt. Hasan Efendi tarafından husûs-ı âti’z-zikre vekîl olup bimâ hüve nehcü’s-sübût şer‘an vekâleti sâbite olan Davud b. Ali nâm kimesne mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp, silk-i mülkümde münselik Hâslar kazâsına tâbi‘ Cebe nâm karyede vâki‘ bir bâb fevkānî evleri ve üç bâb odaları ve bir samanlığı ve bir ahırı müştemil hudûdu inde’l-ahâlî ve’l-cîrân ma‘lûme olan menzilimi, müvekkile-i merkūmeye tarafeynden îcâb ve kabûlü hâvî bey‘-i bât-ı sahîh-i şer‘î ile yirmi iki bin nakd-i râyic fi’l-vakt akçeye bey‘ edip, ol dahi iştirâ ve kabûl eyleyip ve karye-i mezbûre sınırı dâhilinde vâki‘ tahmînen yirmi müd tohum ekilir her biri inde’l-ahâlî ma‘lûmü’l-hudûd olan ( ) kıt‘a tarlaların hakk-ı tasarrufunu dahi sâhib-i arz izin ve ma‘rifeti ile müvekkile-i merkūmeye on beş bin mezbûru’n-na‘t akçe mukābelesinde tefvîz edip, ol dahi tefevvuz ve kabûl eyledikden sonra semeni olan meblağ-ı mezbûr yirmi iki bin akçe ile bedel-i tefvîz olan meblağ-ı mezbûr on beş bin akçeyi müvekkile-i merkūme yedinden bi’t-tamâm ve’l-kemâl ahz u kabz edip, menzil-i mezbûru ve sâlifü’l-beyân olan tarlaları mahallinde kabza müvekkile-i merkūmeyi taslît eyledim dedikde, mukırra-i merkūmenin minvâl-i meşrûh cârî ve sâdır olan ikrârını vekîl-i mesfûr Davud vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir min Muharremi’l-harâm li sene selâsin ve erba‘în ve elf. Şuhûdü’l-hâl: İbrahim Çelebi b. Mahmud el-İmâm, Receb b. Hamdullah, Ali Efendi b. Abdünnebî, el-Hâc Hüseyin b. ( ) el-Müezzin, Mehmed Bey b. İbrahim, İsmail Ağa b. ( ) el-Cündî, Resûl Bey b. ( ) el-bevvâb, Solak Ahmed Bey b. ( ), Mehmed Beşe b. ( ), Ali b. ( ) kör.