Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 97 Hüküm no: 69 Orijinal metin no: [14b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Beşe b. Mahmud’un Saliha bt. İbrahim’den aldığı parayı iâde etmesi Mahmiye-i Kostantıniyye’de Demirkapı mahallesinde sâkine olan işbu bâ‘isetü’l-kitâb Saliha bt. İbrahim nâm hâtun meclis-i şer‘de, mahmiye-i merkūmede yeni odalarda yirmi üçüncü cemâ‘atin odabaşısı olan Süleyman Beşe b. Mahmud nâm râcil mahzarında takrîr-i da‘vâ edip, mezbûr Süleyman Beşe bundan akdem bi gayri vech-i şer‘î yirmi beş riyâlî guruşum alıp kabz etmiş idi. Hakīkat-i hâl suâl olunup alıverilmek taleb ederim dedikde, gıbbe’s-suâl merkūm Süleyman Beşe cevâbında, fi’l-vâki‘ müdde‘iyye-i merkūme Saliha Hâtun’dan vech-i meşrûh üzre yirmi beş riyâl guruş almış idim. Lâkin merkūmenin zevc-i mutalliki olup hâzır bi’l-meclis olan el-Hâc Mehmed Beşe nâm râcil zimmetinde zikr olunan odanın düzeni akçesinden yirmi beş riyâlî guruş olup mezbûr el-Hâc Mehmed Beşe mukaddemâ şark seferine gidip hayli zamân mürûr etmekle zikr olunan yirmi beş riyâl guruşu sâbıkan zevcesi olan merkūme Saliha Hâtun’dan aldım idi deyü i‘tirâf edicek, merkūm Süleyman Beşe’nin bi gayri vech-i şer‘î aldığı yirmi beş riyâl guruşu edâsına tenbîh olunup, mâ vaka‘a bi’t-taleb ketb olundu. [15a] Tahrîren fî evâhiri’l-Muharremi’l-harâm li sene selâsin ve erba‘în ve elf. Şuhûdü’l-hâl: Ahmed b. Hüseyin, Piyâle Çavuş b. Abdullah, Mansur b. Emircan, Mehmed Efendi b. Mehmed el-Kadı, Ahmed b. Hüseyin.