Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 98 Hüküm no: 70 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Osman b. Mustafa’nın Tebrizli tüccârlar Dellâl Mehmed ve ortaklarında alacağının kalmadığı Vilâyet-i Anadolu’da vâki‘ medîne-i Kayseriye ahâlîsinden tüccâr tâifesinden olup, hâlâ mahmiye-i Kostantıniyye’de Pîr Paşa hânında sâkin olan el-Hâc Osman b. Mustafa nâm kimesne meclis-i şer‘de, diyâr-ı Acem’de vâki‘ kasaba-i Tebriz ahâlîsinden olup mahmiye-i merkūmede Sultan Odaları nâm hucurâtın birinde sâkin olan bâ‘isü’l-kitâb Mehmed Dellâl nâm kimesne tarafından ikrâr-ı âti’z-zikri tasdîka vekîl olup, vekâleti mahzar-ı hasm-ı câhidde Mehmed Çavuş b. Nusret ve Bünyad b. İsmail nâm kimesne şehâdetleri ile sâbite olan Mustafa Çavuş b. Hasan nâm kimesne mahzarında bi tav‘ihî ikrâr ve takrîr-i kelâm edip, müvekkil-i merkūm Dellâl Mehmed ile gāibeyn ani’l-meclis olan Mehmed Takī ve Mehmed İhsan ve Mehmed Kerim ve el-Hâc Murad Fazıl ve Eşekli Receb nâm kimesneler bundan akdem ticâret umûrunda abd-i me’zûnum olan Hasan b. Abdullah nâm kimesneden zikr olunan kasaba-i Tebriz’de ber vech-i iştirâk bin üç yüz riyâlî guruşum alıp, her biri âharın zimmetine lâzım gelen iltizâm ve kabûlü hâviye kefâlet-i sahîha ile kefîl olduklarını medîne-i Erzurum’da şuhûd-ı udûl ile hâkimü’ş-şer‘ huzûrunda isbât edip, nakl-i şehâdet ihrâc eyledikden sonra şürekâ-i merkūmînden sâlifü’z-zikr Mehmed Takī’ye kasaba-i Tokat’da rast gelip, asâlet ve kefâleti hasebiyle deyn-i merkūmun üç yüz riyâl guruş mukābelesinde yedinden yedi re’s mâye deve alıp kabz ettikden sonra bunda gelip müvekkil-i merkūm Dellâl Mehmed’i bulup mazmûn-ı nakl-i merkūmu muvâcehesinde şer‘ ile isbât etmekle deyn-i merkūmun bakiyyesi olan bin guruş mezbûr Dellâl Mehmed’den kezâlik asâleten ve vekâleti hasebiyle hükm olunup savb-ı şer‘den haps olunmuş idi. El-hâletü hâzihî zikr olunan bin riyâlî guruş hakkımın sekiz yüz riyâlî guruşunu müvekkil-i mezbûr Dellâl Mehmed’in yedinden alıp kabz edip, mâ‘adâsı olan iki yüz guruşdan bi’l-külliye fâriğ olup müvekkil-i mezbûr Dellâl Mehmed ile şerîkleri olan merkūmûn Mehmed Takī ve Mehmed İhsan ve Mehmed Kerim ve Hacı Murad Fazıl ve Eşekli Receb’in zimmetlerini ibrâ ve iskāt eyledim. Min ba‘d zikr olunan bin üç yüz riyâlî guruşdan müvekkil-i merkūm Dellâl Mehmed ile şerîkleri merkûmûn zimmetlerinde bir akçe ve bir habbe hakkım kalmadı dedikde, mukırr-ı merkūm el-Hâc Osman’ı kelimât-ı meşrûhasında mezbûr Mustafa Çavuş dahi bi’l-vekâle tasdîk ve kaziyye bu minvâl üzre câriye olduğunu tahkīk edicek, mâ vaka‘a bi’t-taleb ketb olundu. Tahrîren fî âşeri’l-Muharremi’l-harâm li sene selâsin ve erba‘în ve elf. Şuhûdü’l-hâl: Mehmed Çavuş b. Nasuh Çavuş, Hüseyin Çelebi b. Abdullah, el-Hâc Ali b. Abdi, İbrahim Çelebi b. Dede, Mustafa Çavuş el-Mübâşir.