Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 101 Hüküm no: 73 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hatun’un Mehmed Bey’deki alacağının sulhen karara bağlandığı Mahmiye-i İstanbul’da Kurşunlu karye mahallesinde sâkine Hatice Hâtun bt. ( ) tarafından husûs-ı âti’z-zikre vekîl olup, hasm-ı câhid-i şer‘î mahzarında bimâ hüve nehcü’s-sübût şer‘an vekâleti sâbite olan Mustafa Bey b. Seydî meclis-i şer‘-i hatîr-i lâzımü’t-tevkīrde, işbu hâmilü’l-kitâb Mehmed Bey b. ( ) nâm kimesne mahzarında bi’l-vekâle ikrâr ve takrîr-i kelâm edip, müvekkile-i mezbûre Hatice Hâtun’un merkūm Mehmed Bey zimmetinde beynlerinde ma‘lûm husûsdan seksen üç riyâlî guruş hakkı olup, meblağ-ı mezbûru merkūm Mehmed Bey’den da‘vâ ve taleb ve ahz u kabza ve lâzım gelirse musâlahaya beni mukaddemâ tevkîl eyledikde, ben dahi vekâletim hasebiyle meblağ-ı mezbûr seksen üç riyâlî guruşu merkūm Mehmed Bey’den da‘vâ ve taleb eylediğimde, ol dahi vermede ta‘allül etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi. El-hâletü hâzihî beynimize muslihûn tavassut edip merkūm Mehmed Bey ile beynimizde dört bin beş yüz akçe üzerine akd-i sulh inşâ ettiklerinde, ben dahi vekâleten sulh-ı mezbûru kabûl ve bedel-i sulh olan meblağ-ı mezbûr dört bin beş yüz akçeyi merkūm Mehmed Bey yedinden vekâletim hasebiyle bi’t-tamâm ve’l-kemâl ahz u kabz edip zimmetini ibrâ-i âm ile ibrâ ve iskāt eyledim dedikde, gıbbe’t-tasdîk mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir mine’l-Muharremi’l-harâm li sene selâsin ve erba‘în ve elf. Şuhûdü’l-hâl: Mehmed Çavuş b. Şaban el-Mübâşir, Piyâle Çavuş b. Abdullah, Yusuf Bey b. Şaban, Ali Efendi b. Abdullah, muharriru’l-hurûf Sezâyî Mehmed Efendi, Abdi Beşe b. Mehmed er-Râcil.