Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 101 Hüküm no: 74 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Üveys’in Sitti Hatun Vakfı’ndan icâreteyn yoluyla kiraladığı odayı peşin verdiği bedeli alıp iâde ettiği Mahmiye-i Kostantıniyye’de Muhtesib Karagöz mahallesinde sâkin olan Ali Çelebi b. Üveys nâm kimesne meclis-i şer‘-i hatîr-i lâzımü’t-tevkīrde, mahmiye-i merkūmede vâki‘ mağfûrun lehâ Sitti Hâtun Vakfı’nın bi’l-fi‘il mütevellîsi olan hâfızu’l-kitâb Osman Bey b. Mehmed nâm kimesne mahzarında bi tav‘ihî ikrâr ve takrîr-i kelâm edip, vakf-ı merkūmdan mahmiye-i mersûmede vâki‘ bir bâb tahtânî ve üç bâb fevkānî odayı ve bir su kuyusunu ve kenîfi müştemil olup iki tarafı vakf-ı merkūm ve bir tarafı tarîk-i hâs ve bir tarafı âm ile mahdûd olup, bundan akdem yirmi bin akçe ücret-i mu‘accele ve yevmî iki akçe icâre-i müeccele ile yedimde ve taht-ı tasarrufumda olan bir bâb odayı hüsn-i ihtiyârım ile taraf-ı vakfa fâriğ olup merkūm Osman Bey’e teslîm eylediğimde, mezbûr dahi tevliyet-i mahkiyyesi hasebiyle vakf için kabz ve tesellüm edip cânib-i vakfda olan yirmi bin akçe ücret-i mu‘acceleyi bi’t-tamâm ve’l-kemâl bana def‘ ve teslîm etmekle yedinden alıp kabz ve tesellüm eyledim. Min ba‘d zikr olunan odada bir vechile alâkam yokdur dedikde, mukırr-ı merkūm Ali Çelebi’yi kelimât-ı meşrûhasında mütevellî-i merkūm Osman Bey dahi bi’l-muvâcehe tasdîk ve bi’l-müşâfehe tahkīk edicek, mâ vaka‘a bi’t-taleb ketb olundu. Tahrîren fî evâhir Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Kıdvetü’l-ulemâ’i’l-kirâm Abdülaziz Efendi [b.] neclü’l-müvellâ el-merkūm Hüsameddin Efendi, Fahrü’l-müderrîsîni’l-kirâm Hamdi Efendi, Hasan Çavuş b. Mustafa, Hasan Bey b. Mustafa el-Mübâşir, Halil b. Mustafa, Receb Çavuş [b.] Abdullah, Mustafa Çavuş b. Murad, es-Seyyid Abdürrauf Efendi el-Müderris, Yahya Çelebi b. Alâaddin, Mehmed Bey b. Mustafa.