Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 102 Hüküm no: 76 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Çavuş b. Abdullah’ın sahip olduğu vakıf menzilin tasarruf hakkını Hasan Bey b. Abdullah’a devrettiği Mahmiye-i İstanbul’da Mimar Sinan mahallesi sâkinlerinden Yusuf Çavuş b. Abdullah mahfil-i kazâda, işbu hâmilü’l-kitâb Hasan Bey b. Abdullah mahzarında bi’t-tav‘i’s-sâf ikrâr ve i‘tirâf edip, mahalle-i mezbûrede vâki‘ merhûm İsmail Ağa Vakfı’ndan icâre-i mu‘accele ve yevmî iki buçuk akçe ücret-i müeccele ile mutasarrıf olduğum iki tarafı vakf-ı mezbûr ve bir tarafı Hasan Efendi b. ( ) mülkü ve bir tarafı tarîk-i âm ile mahdûd olup, bir beyt-i süflîyi ve bir beyt-i ulvîyi ve tahta-pûşu ve kenîfi müştemil olan menzilinin hakk-ı tasarrufunu mütevellî-i vakf-ı mezbûr izin ve ma‘rifeti ile mezbûr Hasan Bey’e on bin nakd-i râyic fi’l-vakt akçe bedel-i tefvîz ile tefvîz edip, ol dahi tefevvuzü kabûl eyledikden sonra mukābele-i tefvîzde olan meblağ-ı mezbûru yedinden bi’t-tamâm ve’l-kemâl ahz u kabz eyledim. Ba‘de’l-yevm ücret-i mu‘accelesini cânib-i vakf-ı mezkûra edâ ve îfâ eyleye [ve] sâyir emsâli gibi mutasarrıf ola dedikde, mukırr-ı mezbûr Yusuf Çavuş’un minvâl-i meşrûh üzre cârî ve sâdır olan ikrârını mezbûr Hasan Bey vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir min Muharremi’l-harâm li sene [1]143. Şuhûdü’l-hâl: İskender Bey b. Şaban el-muhzır, Süleyman Bey b. Zekeriya el-muhzır, Hüseyin Bey b. Ahmed el-muhzır, Yusuf Bey b. Şaban el-muhzır, Receb b. Yusuf, Musa b. Abdullah, Mustafa b. Mehmed.