Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 102 Hüküm no: 75 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müferrah bt. Abdullah’ın çocuklarının Fâtıma bt. Hasan Efendi’ye satılan menzil ve tarlalarla bağlarının kalmadığı Mahrûse-i Üsküdar’da sâkin Mehmed Çelebi ve Râbia ve Havva nâm kimesneler meclis-i şer‘-i hatîr-i lâzımü’t-tevkīrde, işbu hâtimetü’l-kitâb Fâtıma bt. Hasan Efendi nâm hâtun tarafından ikrâr-ı âti’l-beyânı tasdîka vekîl olup, bimâ hüve nehcü’s-sübût şer‘an vekâleti sâbite olan Davud b. Ali muvâcehesinde bi’t-tav‘i’s-sâf ikrâr ve i‘tirâf edip, vâlidemiz Müferrah bt. Abdullah’ın mülk-i mahzı olup, işbu meclisde müvekkil-i merkūmeye bey‘ ve teslîm eylediği Hâslar kazâsına tâbi‘ Cebeli nâm karyede olan menzilde ve hak ve tasarrufunu tefvîz eylediği karye-i mezbûre sınırı dâhilinde olan tarlalarında min ba‘d alâka ve medhalim yokdur dediklerinde, mukırrûn-ı mezbûrûnun minvâl-i meşrûh üzre olan kelimâtı[nı] vekîl-i mezkûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fî evâsıt Muharremü’l-harâm li sene selâsin ve erba‘în ve elf. Şuhûdü’l-hâl: İbrahim Çelebi b. Mahmud, Receb b. Hamdullah, Ali b. Abdünnebî, el-Hâc Hüseyin b. ( ) el-Müezzin, Mehmed Bey b. İbrahim, İsmail Ağa b. ( ) el-Cündî, Resûl Bey b. ( ) el-bevvâb, Ahmed Bey b. ( ) el-Yesârî, Mehmed Beşe b. ( ), Ali b. ( ) kör.