Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 104 Hüküm no: 78 Orijinal metin no: [16a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. İskender ile ortağı Yehpe v. Kohen’in, Asador v. Sefer ile Sefer v. Natal’e borçlu oldukları Medîne-i Haleb-i şehbâ’da gümrük mukāta‘ası emîni olup hâlâ mahmiye-i Kostantıniyye’de Avratpazarı’nda sâkin Mustafa Çelebi b. İskender nâm kimesne tarafından husûs-ı âti’l-beyânı ikrâra vekîl olup, vekâleti mahzar-ı hasm-ı câhidde Süleyman Bey b. Ahmed ve el-Hâc Rıdvan b. Abdullah nâm kimesneler şehâdetleriyle sâbite olan Mehmed Çelebi b. Abdullah nâm kimesne ile emîn-i merkūm Mustafa Çelebi’nin emânet-i merkūmede şerîki olup, hâlâ mahmiye-i merkūmede Yahudiler mahallesinde sâkin olan Yehpe v. Kohen nâm Yahudi tarafından kezâlik husûs-ı âti’z-zikri ikrâra vekîl olup, vekâleti şâhidân-ı merkūmân şehâdetleri ile sâbite olan Salamon v. Avraham nâm Yahudi meclis-i şer‘de, işbu hâmiletü’l-kitâb Asador v. Sefer ve Sefer v. Natal nâm zimmîler muvâcehelerinde her biri bi’l-vekâle ikrâr ve takrîr-i kelâm edip, müvekkilân-ı merkūmân Mustafa Çelebi ve Yehpe Yahudi mersûmân Asador ve Sefer’den ber vech-i iştirâk senevî iki bin yüz otuz dört aded riyâl guruş istidâne ve tesellüm eylediklerinden sonra zikr olunan iki bin yüz otuz dört riyâl guruşu târih-i kitâbdan beş ay tâmamında edâ ve îfâya ta‘ahhüd edip yedlerine hat ve hâtemlerini müştemil ve deyn-i merkūma i‘tirâflarını nâtıka tezkire verdiklerinde merkūmân Asador ve Sefer dahi müddet-i merkūme tamâmında vech-i meşrûh üzre istîfâ ve tesellüme râzî oldular dediklerinde, merkūmân Mehmed Çelebi ve Salamon yahudinin bi’l-vekâle sudûr eden i‘tirâflarını merkūmân Asador ve Sefer dahi bi’l-muvâcehe tasdîk ve deyn-i merkūmu müddet-i merkūme tamâmında istîfâ ve tesellüme râzî olduklarını tahkīk edicek mâ vaka‘a bi’t-taleb ketb olundu. Tahrîren fi’l-yevmi’r-râbi‘ aşer min şehri’l-Muharremi’l-harâm li sene selâsin ve erba‘în ve elf. Şuhûdü’l-hâl: Ahmed Bey b. Abdullah, Mehmed Beşe b. Abdullah, İsmail b. İbrahim, Piyâle Çavuş b. Abdullah, Behrâm Bey b. Abdülmennân.