Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 104 Hüküm no: 79 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Şaban Beşe’nin babasının terekesi davasında Yeniçeri beytülmâl emini ile sulh oldukları Vilâyet-i Rumeli’nde kasaba-i İnöz ahâlîsinden olup bundan akdem müteveffâ olan Şaban Beşe b. Nahura? nâm râcilin li-ebeveyn ammi kızının oğlu ve bi tarîki’l-hasr vârisi olan Ali Beşe b. ( ) nâm kimesne meclis-i şer‘de mahmiye-i Kostantıniyye’de vâki‘ yeniçeri tâifesinin beytülmâl emîni olan bâ‘isü’l-kitâb Mehmed Ağa b. İlyas nâm kimesne mahzarında bi tav‘ihî ikrâr ve takrîr-i kelâm edip, müteveffâ-yı merkūm Şaban Beşe’nin zâhirde vâris-i ma‘rûfu olmamak zu‘mi ile terekesine Mezbûr Mehmed Ağa emâneti hasebiyle vaz‘-ı yed etmekle, ben dahi müteveffâ-yı merkūmun li-ebeveyn ammi kızının oğlu ve bi tarîki’l-hasr vârisi olduğumu kasaba-i merkūmede hâkimü’ş-şer‘ huzûrunda şuhûd-ı udûlle isbât edip, nakl-i şehâdet ihrâc etmekle mazmûn-ı nakli emîn-i merkūm Mehmed Ağa’nın muvâcehesinde şer‘le isbât edip, müteveffâ-yı merkūmenin terekesinden makbûzu olan meblağ-ı nîm için savb-ı şer‘den hükm olunup hüccet tahrîr olundukdan sonra mezbûr Mehmed Ağa’nın tereke-i merkūmeden makbûzu olan elli dört bin dört yüz akçeyi [taleb] eylediğimde mezbûr Mehmed Ağa dahi ol mikdâr akçe kabz eylediğini münkir olup, münâza‘ât-ı kesîre vukū‘undan sonra tavassut-ı muslihûn ile on yedi bin akçeye sulh eylediklerinde, sulh-ı mezbûr her vechile cânib-i mîrîye nâfî olmağın merkūm Mehmed Ağa dahi bedel-i sulh-ı merkūm olan sâlifü’z-zikr on yedi bin akçeyi bi’t-tamâm ve’l-kemâl bana def‘ ve teslîm edip, ben dahi ba‘de kabûli’s-sulh bedel-i sulh-ı merkūmu emîn-i merkūmun yedinden alıp kabz ve tesellüm edip mâ‘adâsından emîn-i merkūm Mehmed Ağa’nın zimmetini bi’l-külliye ibrâ-i âmm-ı kātı‘u’n-nizâ‘la ibrâ ve iskāt eyledim. Min ba‘d merkūm Mehmed Ağa ile tereke-i mersûmeye müte‘allik da‘vâ ve nizâ‘ım yokdur dedikde, mukırr-ı merkūm Ali Beşe’nin minvâl-i muharrer üzre sudûr eden i‘tirâfını merkūm Mehmed Ağa dahi bi’l-muvâcehe tasdîk ve sulh-ı mezbûru tahkīk edicek, mâ vaka‘a bi’t-taleb ketb olundu. Tahrîren fî evâsıti’l-Muharremi’l-harâm li sene selâsin ve erba‘în ve elf. Şuhûdü’l-hâl: Ahmed Ağa b. Bâli nâzır-ı beytülmâl, İbrahim Çelebi b. el-Hâc Mehmed el-Kâtib, el-Hâc Mehmed b. Halil, İbrahim Beşe b. Abdullah el-Mübâşir, Ahmed Beşe el-Kilârî, Mehmed Beşe er-Râcil.