Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 109 Hüküm no: 84 Orijinal metin no: [17a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan Bey b. Ahmed’in vârislerinin birbirlerinin zimmetini ibrâ etmesi Dârü’s-saltanati’s-seniyye mahmiye-i Kostantıniyye’de vâki‘ Saray-ı cedîd-i sultânîde bundan akdem peşkircibaşı olup müteveffâ olan Ramazan Bey b. Ahmed nâm kimesnenin verâseti, vâlidesi Kamer bt. Abdullah nâm Hâtun’a ve li-ebeveyn kardeşi Mehmed nâm kimesneye münhasıra olduğu zâhir ve müte‘ayyin oldukdan sonra merkūm Mehmed kendi nefsinden asâleten ve vâlidesi merkūme Kamer Hâtun tarafından husûs-ı âti’l-beyâna vekîl olup, vekâleti nehc-i mu‘teber üzre sâbit oldukdan sonra vekâleten meclis-i şer‘de, mahmiye-i merkūmede Hacı Ali mahallesinde bundan akdem müteveffâ olan Mehmed Ağa nâm kimesnenin sulbî oğulları Mustafa ve Ahmed nâm sagīrlerin li’l-ihtiyâc men lehü’n-nasb olan hâkim tarafından mansûb vasîleri olan işbu bâ‘isü’l-kitâb Hasan b. Ali nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip, müteveffâ-yı merkūma Mehmed Ağa bundan akdem hâl-i hayâtında kardeşim müteveffâ-yı mesfûr Ramazan Bey’den on yedi bin nakd-i râyic alıp kabz edip, yedine hat ve hâtemini müştemil ve bin yirmi dokuz senesi Muharremü’l-harâmının evâ’ili târihiyle müverrah ve deyn-i merkūma i‘tirâfını hâvî temessük vermek ile ba‘de vefâtihimâ muhallefâtından bi’l-asâle ve bi’l-vekâle taleb eylediğimde, mezbûr Hasan dahi bi’l-vesâye inkâr edip, ben dahi deyn-i merkūmu vasîyy-i merkūm muvâcehesinde şuhûd-ı udûl ile isbât sadedinde iken beynimizde muslihûn tavassut edip, on beş bin nakd-i râyic fi’l-vakt akçeye sulh eylediklerinde, sulh-ı mezbûr her vechile sagīrler hakkında nâfi‘ olmağın ben dahi sulh-ı mezbûru kabûl ve bedel-i sulh-ı merkūmu bi’t-tamâm ve’l-kemâl müteveffâ-yı merkūm Mehmed Ağa’nın muhallefâtından vasîyy-i merkūm Hasan’ın yedinden alıp kabz edip, zikr olunan on yedi bin akçeye müte‘allik olan da‘vâ ve talebinden bi’l-asâle ve bi’l-vekâle müteveffâ-yı merkūm Mehmed Ağa’nın zimmetin ibrâ ve iskāt eyledim dedikde, mukırr-ı merkūm Mehmed’in bi’l-asâle ve bi’l-vekâle sudûr eden i‘tirâfını mezbûr Hasan dahi bi’l-vesâye tasdîk ve akd-i sulh-ı mezbûru [tahkīk] edicek, mâ vaka‘a bi’t-taleb ketb olundu. Tahrîren fî evâhiri Muharremi’l-harâm li sene selâsin ve erba‘în ve elf. Şuhûdü’l-hâl: Hasan Çavuş b. Abdullah, Hasan Halîfe el-Müezzin, İsmail b. Abdullah, Hüseyin b. Abdullah, Mehmed b. Seydî, Şaban b. Yakub.