Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 108 Hüküm no: 83 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Yasef’in Ahmed Halîfe b. Hasan’a olan borcunu ödemesi İşbu hâmilü’l-kitâb Ahmed Halîfe b. Hasan meclis-i şer‘-i hatîr-i lâzımü’t-tevkīrde, Portakal cemâ‘atinden Salamon v. Yasef nâm Yahudi muvâcehesinde üzerine takrîr-i da‘vâ edip, mezbûr Salamon zimmetinde cihet-i karz-ı şer‘îden on sekiz bin beş yüz on akçe hakkım olup hâlâ taleb eylediğimde ta‘allül eder suâl olunup alıverilmek matlûbumdur dedikde, gıbbe’s-suâl mezbûr Salamon cevâbında, fi’l-hakīka müdde‘î-i mezbûr Ahmed Halîfe’ye zimmetimde lâzımü’l-edâ ve vâcibü’l-kazâ on sekiz bin beş yüz on akçe deynim vardır deyü i‘tirâf etmeğin, i‘tirâfı mûcebince mezbûr Salamon meblağ-ı mezbûr on sekiz bin beş yüz on akçenin edâsıyla ilzâm olunup, mâ hüve’l-vâki‘ bi’t-taleb ketb olundu. Tahrîren fî evâsıti’l-Muharremi’l-harâm li sene selâsin ve erba‘în ve elf. Şuhûdü’l-hâl: Fahrü’l-a‘yân Mehmed Ağa b. ( ), Fahrü’l-akrân Yusuf Ağa b. ( ) kadı, İskender b. Şaban, Mehmed b. Abdullah, Yusuf Çelebi b. ( ) el-Kâtib, Hüseyin b. ( ) eş-şehîr bi Şarlı, Ali b. ( ) eş-şehîr bi Arnavud, Ali Çavuş b. ( ), Mustafa b. ( ) eş-şehîr bi Rum, Mahmud Ağa b. ( ).