Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 112 Hüküm no: 89 Orijinal metin no: [17b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Subaşı b. Abdullah’ın evini Mustafa Beşe b. Şaban ve karısı Asiye Hatun bt. Abdullah’a sattığı Mahmiye-i Kostantıniyye mahallâtından Mimar Şucâ‘ mahallesi ahâlîsinden Mehmed Subaşı b. Abdullah kıbelinden hasm-ı şer‘î mahzarında ikrâr-ı bey‘a ve kabz-ı semene vekâleti Mustafa b. Ebûbekir ve el-Hâc Ahmed Yusuf’un şehâdetleri ile sâbit olan el-Hâc Mehmed b. Malkoç nâm kimesne meclis-i şerî‘at-i şerîfe-i garrâda hâzır olup, müvekkil-i merkūmunun, işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahalle-i mezbûrede vâki‘, fevkānî iki beyti, selâmlığı, ahırı, su kuyusunu, eşcâr-ı müsmire ve gayr-ı müsmireyi hâvî avluyu müştemil, bir tarafdan Mehmed Subaşı mülkü, diğer tarafdan Ayşe Hâtun bt. Mehmed Bey mülkü, bir cânibden vekîl-i merkūm el-Hâc Mehmed mülkü ve diğer cânibden de tarîk-i âm ile mahdûd bulunan cemî‘-i menzilini cümle hudûdu ve kâffe-i hukūku ile râyicü’l-vakt otuz dokuz bin akçe semen-i mu‘ayyen-i makbûzla Mustafa Beşe b. Şaban er-Râcil ve Asiye Hâtun bt. Abdullah’a îcâb ve kabûl ve teslîm tesellümü hâvî bey‘-i bât-ı sahîh ile bey‘ ettiğini ikrâr ve i‘tirâf etti. Müşteriyân-ı merkūmân kendi mâllarıyla ve kendileri için menzil-i mezbûru ondan iştirâ ettiler. Vâki‘ ikrâr, müşterî-i mezbûr Mustafa Beşe tarafından kendi nefsinden asâleten ve müşteriye-i merkūme zevcesi kıbelinden ikrârı tasdîka vekâleti bi mâ hüve tarîkü’s-sübût şer‘an sâbit olarak vekâleten tasdîk edildi. Cerâ zâlike ve hurrire fî evâhiri’l-Muharremi’l-harâm sene selâse ve erba‘în ve elf. Şuhûdü’l-hâl: Süleyman Beşe b. Hüseyin er-Râcil, Hüseyin Çelebi b. İmran el-Müezzin, Ahmed Beşe b. Abdullah, el-Hâc Şaban b. Nasuh, Hüseyin Bey el-Cündî, Ahmed Çelebi el-Cündî, Süleyman b. Bâli, Mehmed Halîfe b. Nimetullah, Mehmed Bey el-Cündî, Mehmed Efendi el-kadı, el-Hâc Sinan b. Abdullah