Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 118 Hüküm no: 98 Orijinal metin no: [19a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Turgud Çavuş’un Kastamonu’daki çiftlik menzili ve tarlalarını İbrahim Bey b. el-Hâc Mustafa’ya sattığı ve devrettiği Vilâyet-i Anadolu’da Kastamonu kazâsına tâbi‘ Akkubbe nâhiyesinde Eceoğlu nâm karyede sâkin Mehmed Bey b. Turgud Çavuş nâm kimesne meclis-i şer‘-i hatîr-i lâzımü’t-tevkīrde, işbu hâmilü’l-kitâb İbrahim Bey b. el-Hâc Mustafa mahzarında bi’t-tav‘i’s-sâf ikrâr ve i‘tirâf edip, silk-i mülkümde münselik karye-i mezbûrede vâki‘ bir tarafı mezbûr İbrahim Bey mülkü ve bir tarafı Mustafa Çelebi b. Mustafa mülkü ve bir tarafı Veli b. ( ) mülkü ve bir tarafı tarîk-i âm ile mahdûd olup, bir beyt-i ulvî ve altında ahır ve bir samanlık ve bir çatma anbar ve bir öküz damını ve zât-ı eşcâr-ı müsmire ve gayr-ı müsmire hadîkayı ve mülk mâ-i cârîyi müştemil olan çiftlik menzilini mezbûr İbrahim Bey[’e] iki bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bât-ı sahîh-i şer‘î ile bey‘ edip, ol dahi iştirâ ve kabûl eyledikden sonra yine karye-i mezbûre sınırı dâhilinde mevâzi‘-i müteferrikada vâki‘ bana intimâ ile her birinin hudûdu lede’l-ahâlî ve’l-cîrân ma‘lûme olan ( ) kıt‘a tarlalarımın hakk-ı tasarrufunu sâhib-i arz izin ve ma‘rifeti ile mezbûr İbrahim Bey’e on dört bin nakd-i râyic fi’l-vakt akçe bedel-i tefvîz ile tefvîz edip, ol dahi tefevvuz ve kabûl eyledikden sonra semen-i merkūm iki bin akçe ve bedel-i tefvîz olan meblağ-ı mezbûr on dört bin akçe ki cem‘an on iki bin akçe olur mezbûr İbrahim Bey yedinden bi’t-tamâm ve’l-kemâl ahz u kabz edip, çiftlik-i mezbûr ve sâlifü’z-zikr tarlaları mahallinde kabza mezbûr İbrahim Beyi taslît eyledim. Ba‘de’l-yevm zikr olunan çiftlik ve tarlalara keyfe mâ yeşâ ve yahtâr mutasarrıf olsun dedikde, mukırr-ı mezbûr Mehmed Bey’in minvâl-i meşrûh üzre cârî ve sâdır olan ikrârını müşterî-i mezbûr İbrahim Bey vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min Saferi’l-hayr li sene selâsin ve erba‘în ve elf. Şuhûdü’l-hâl: Mustafa Efendi b. el-Hâc Ali, Mehmed Bey b. Ahmed, Süleyman b. Mustafa, Piyâle b. Abdullah, Mehmed b. Hüseyin, Hasan b. Hüseyin, İbrahim b. ( ) el-attâr, Şaban b. ( ) Ta‘lîmhâneci.