Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 119 Hüküm no: 99 Orijinal metin no: [19a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Belkıs Hanım’ın mehir alacağının ölen kocası Karaçelebizâde Mehmed Efendi’nin terekesinden alınıp mirasçılarına intikal ettiği Mahmiye-i İstanbul’da Muhtesib Karagöz mahallesinde sâkin iken bundan akdem vefât eden merhûme ve mağfûrun-lehâ Belkıs Hanım bt. el-merhûm Se[yyi]d Ahmed Paşa’nın verâseti zevc-i metrûkü olup kendinden sonra vefât eden merhûm ve mebrûr Karaçelebizâde Mehmed Efendi’ye ve li-ebeveyn hemşîresi Aişe Hâtun’a ve sadriye kebîre kızı umdetü’l-muvakkarât tâcü’l-mestûrât Fâtıma Hâtun’a münhasıra olduğu şer‘an mütehakkık oldukdan sonra müşârunileyhâ Fâtıma Hanım tarafından husûs-ı âti’z-zikre vekîl olup, Behrâm Bey b. Abdullah ve Yusuf Bey b. Abdullah şehâdetleri ile şer‘an vekâleti sâbite olan fahrü’l-akrân Veli Bey b. Mustafa meclis-i şer‘-i hatîr-i lâzımü’t-tevkīrde, merhûm-ı müşârunileyh Karaçelebizâde Mehmed Efendi hazretlerinin necl-i necîl ve selîl-i asîli olup sâbıkan Edirne kadısı olan umdetü’l-ulemâ’i’l-izâm kıdvetü’l-fuzalâ’i’l-fihâm yenbû‘ü’l-fazli ve’l-me‘âlî metbû‘ü’l-efâzil ve’l-e‘âlî Mahmud Efendi hazretlerinin taraf-ı pür-şereflerinden ikrâr-ı âti’l-beyânı tasdîka vekîl olup fahrü’l-kuzât Ali Efendi b. Üveys ve Hasan Bey b. Mustafa şehâdetleri ile şer‘an vekâleti sâbite olan umdetü’l-kuzât Abdülkādir Efendi b. Mahmud mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î kılıp, müvekkile-i müşârunileyhânın vâlidesi merhûme-i mezkûre Belkıs Hanım’ın merhûm-ı müşârunileyh Mehmed Efendi zimmetinde mehr-i müeccelinden yüz bin nakd-i râyic fi’l-vakt akçe hakkı olup ba‘de vefâtihâ verâseti vech-i meşrûh üzre merhûm-ı müşârunileyh hemşîresi olup gāib ani’l-meclis olan Aişe Hâtun ve müvekkile-i mûmâ-ileyhâya münhasıra olmağın meblağ-ı mezbûr bunlara intikāl eyledikde, meblağ-ı mezbûrdan müvekkile-i müşârunileyhânın hisse-i şer‘iyyesine isâbet eden elli bin nakd-i râyic fi’l-vakt akçeyi merhûm-ı mûmâ-ileyhin muhallefâtına vâzı‘u’l-yed olan müvekkil-i müşârunileyh Mahmud Efendi hazretlerinden da‘vâ ve taleb eyledikde, anlar dahi inkâr eyleyip şuhûd ve udûl ile müvekkil-i müşârunileyhâ müdde‘âsını mûmâ-ileyh Mahmud Efendi huzûrunda vech-i şer‘î üzre isbât eyleyip ve meblağ-ı mezbûr yüz bin akçeyi merhûme-i mezkûre Belkıs Hanım hâl-i hayâtında zevci müteveffâ-yı müşârunileyh Mehmed Efendi yedinden kabz ve istîfâ ve yahud zimmetini ibrâ eylediğini bilmediğine tahlîf-i şer‘î olunup, ba‘de’l-hükmi’ş-şer‘î merhûm-ı mûmâ-ileyhin muhallefâtından mahmiye-i merkūmede İbrahim Paşa hamamı kurbunda olan sûkda vâki‘ arsasının Fenârîzâde Şeyhî Efendi Vakfı’na beher mâh yirmi akçe mukāta‘ası olup, binâsı mülk olan bir tarafı vakf-ı mezbûr ve bir tarafı Emîr Ayas Vakfı ve bir tarafı ( ) ve bir tarafı tarîk-i âm ile mahdûd olan bir bâb tabbâh dükkânını meblağ-ı mezbûr elli bin akçe mukābelesinde ahz u kabz edip, vâlidesi merhûme-i mezkûrenin mehr-i müeccelinden kendilere isâbet eden meblağ-ı mezbûr elli bin akçeden merhûm-ı mûmâ-ileyh muhallefâtında bir akçe ve bir habbe hakları bâkī kalmadı dedikde, vekîl-i mezkûr Veli’nin minvâl-i meşrûh üzre bi’l-vekâle cârî ve sâdır olan ikrârını vekîl bi’t-tasdîk olan mezkûr Abdülkādir [19b] Efendi bi’l-vekâle vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî min Saferi’l-hayr li sene selâsin ve erba‘în ve elf. Şuhûdü’l-hâl: Umdetü’l-müderrisîn Hamdi Efendi b. Mehmed, Fahrü’l-müderrisîn Mehmed Efendi eş-şehîr bi Çelebi, Umdetü’l-kuzât Bostan Efendi b. ( ), Fahrü’l-kuzât Mustafa Efendi, Mehmed b. Mehmed, Umdetü’l-kuzât Mustafa Efendi eş-şehîr bi Tezkirecizâde.