Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 120 Hüküm no: 100 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üveys Bey b. Yusuf’un vârislerinin miras kahvehâne ve arsasını Bektaş Ağa b. Hasan’a sattıkları ve devrettikleri Mahmiye-i Kostantıniyye’de Karagümrük mahallesinde bundan akdem müteveffâ olan Üveys Bey b. Yusuf nâm kimesnenin sulbî oğulları Mehmed ve Mustafa nâm kimesneler meclis-i şer‘de, mahmiye-i merkūmede Çavuşbaşı Mescidi mahallesi sükkânından olan bâ‘isü’l-kitâb Bektaş Ağa b. Hasan nâm kimesne tarafından husûs-ı âti’l-beyâna vekîl olup, vekâleti mahzar-ı hasm-ı câhidde Ahmed Bey b. Şaban ve diğer Ahmed Bey b. Mustafa nâm kimesneler şehâdetleri ile sâbite olan Hüseyin Bey b. Hasan nâm kimesne mahzarında bi tav‘ihâ ikrâr ve takrîr-i kelâm edip, mahmiye-i merkūmede Yenibahçe nâm mevzi‘ kurbunda vâki‘ bir tarafı merhûm Çivizâde Efendi Vakfı ve bir tarafı Alacacı Receb mülkü ve iki tarafı tarîk-i âm ile mahdûd olup arsasının mahmiye-i merkūmede Aksaray’da câmi‘i olan merhûm Murad Paşa Vakfı’na yevmî ikişer akçe ücret-i maktû‘ası olup üç bâb odayı müştemil olan bir bâb kahvehânenin ebniye-i memlûkesi babamız müteveffâ-yı merkūmdan bi tarîki’l-irsi’ş-şer‘î [bize] intikāl etmişdi. El-hâletü hâzihî zikr olunan kahvehânenin ebniye-i memlûkesi müvekkil-i mûmâ-ileyh Bektaş Ağa’ya elli iki bin nakd-i râyic fi’l-vakt akçeye bey‘-i kat‘î ile bey‘ ve teslîm eylediğimizde, müşârunileyh Bektaş Ağa dahi vech-i meşrûh üzre iştirâ ve kabûl eyledikden sonra semeni olan elli iki bin akçeyi alâ vechi’l-münâsafa meclis-i şer‘de vekîl-i merkūm Hüseyin Bey yedinden alıp kabz ve tesellüm edip arsasının dahi hakk-ı tasarrufunu mütevellî-i vakf-ı merkūm olan Mustafa Bey ma‘rifetiyle müvekkil-i mûmâ-ileyh Bektaş Ağa’ya tefvîz ve teslîm eylediğimizde mezbûr dahi vech-i mastûr üzre tefevvuz ve tesellüm eyledi. Ba‘de’l-yevm keyfe mâ yeşâ mutasarrıf olsun dediklerinde, mukırrân-ı merkūmân Mehmed ve Mustafa’yı ikrâr-ı meşrûhlarında mezbûr Hüseyin Bey dahi bi’l-vekâle tasdîk ve minvâl-i muharrer üzre iştirâ ve tefevvuz edicek, mâ vaka‘a bi’t-taleb ketb olundu. Tahrîren fî evâili Saferi’l-muzaffer min şuhûri li sene selâsin ve erba‘în ve elf. Şuhûdü’l-hâl: Ramazan Efendi el-İmâm, Resûl Halîfe el-Müezzin, Mehmed Efendi el-Müezzin, Hasan b. Memi, Hasan Çelebi, Halil Çelebi b. Ali, Mehmed b. Rıdvan.