Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 123 Hüküm no: 104 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed ve kardeşi Aişe bt. Mehmed Bey üzerine amcaları Kurd Beşe’nin vasî tayin edildiği Mahmiye-i Galata’da Hüseyin Ağa mahallesi sâkinlerinden iken bundan akdem müteveffâ olan Mehmed Bey b. ( ) nâm bevvâb-ı sultânînin li-ebeveyn kardeşi bâ‘isü’l-kitâb Kurd Beşe nâm râcil meclis-i şer‘-i şerîfe kardeşi müteveffâ-yı merkūm Mehmed Bey’in sulbî sagīr oğlu Mehmed’i ve sulbiye sagīre kızı Aişe’yi ihzâr edip, sagīrân-ı merkūmânın vasîleri olmayıp ben ammileri olmakla mezbûrlara kıbel-i şer‘den vasî nasb olunmam murâd ederim deyicek, fi’l-hakīka sagīrân-ı mezbûrâna vasî nasb olunmak lâzım ve mühim olmağın, mezbûr Kurd Beşe sagīrân-ı mezbûrânın tesviye-i umûrları için kıbel-i şer‘den vasî nasb olunup, ol dahi vesâyet-i mezkûreyi kabûl ve hizmet-i lâzımesini edâya müte‘ahhid olmağın, mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ min Saferi’l-hayr li sene selâsin ve erba‘în ve elf. Şuhûdü’l-hâl: Mustafa Çavuş b. ( ), Piyâle Çavuş b. ( ), Yusuf Bey b. Abdullah, Hüseyin b. Ahmed ve gayruhüm mine’l-huzzâr.